अलहबाद् उच्चन्यायालयस्य न्यायाधिपेन कृते विद्वेषप्रभाषणे व्यापकप्रतिषेधः।

उच्चन्यायालयं प्रति सर्वोच्चन्यायालयेन वस्तुताविवरणं मार्गितम्। 

नवदिल्ली> विश्वहिन्दुपरिषदः कार्यक्रमे भागं गृह्णन् विद्वेषप्रभाषणं कृतवन्तं अलहबाद् उच्चन्यायालयस्य न्यायाधिपं शेखर कुंमारयादवं विरुध्य व्यापकः प्रतिषेधः। घटनायां स्वमेधया व्यवधृतवान् सर्वोच्चन्यायालयः अलहबाद् उच्चन्यायालयात् वस्तुताविवरणं मार्गितवान्। 

  एक नागरिक नियममधिकृत्य कृते प्रभाषणे आसीत् विवादपरामर्शः जातः। इस्लामधार्मिकान् विरुध्य अधिक्षेपा‌ः न्यायाधिपात् अजायन्त इति सूच्यते। 

  राष्ट्रस्य शासनसंविधानेन निर्दिश्यमानायाः  नयसंहितायाः विरुद्ध एव शेखर कुमार यादवस्य परामर्शाः इति राष्ट्रपतिं प्रति समर्पिते आवेदने मुस्लिमलीगदलस्य सदस्याः सूचितवन्तः।

 संस्कृतभारत्याः प्रबोधनवर्गः डिसं. २१तः आरभते। 

 कोच्ची> संस्कृतभारती इति संस्कृतभाषासंवर्धकसंघटनस्य केरलविभागस्य नेतृत्वे प्रतिसंवत्सरमायोज्यमानः संस्कृतप्रबोधनवर्गः डिसम्बरमासस्य २१ तमदिनाङ्कादारभ्य २८ तमदिनाङ्कपर्यन्तं एरणाकुलं जनपदस्थे पेरुम्पावूर् अमृत विद्यालये सम्पत्स्यते। २५० युवजनेभ्यः परिशीलनं दास्यते। केरलं, तमिलनाट्, आन्ध्रप्रदेशः,कर्णाटकम् इत्येतेभ्यः राज्येभ्यः युवछात्राः प्रबोधनवर्गशिबिरे भागं करिष्यन्तीति संस्कृतभारत्याः अखिलभारत माध्यमसंयोजकः डो सच्चिन् कठालेवर्यः निगदितवान्। 

  ये परिशीलनं सम्प्रापयिष्यन्ति ते १०१ संख्याकानि अमौपचारिकसंस्कृतशिक्षाकेन्द्राणि प्रचालयिष्यन्ति। पत्रकारसम्मेलने संस्कृतभारत्याः राज्याध्यक्षः डो पि के शङ्करनारायणः , दक्षिणक्षेत्रीयसंघटनकार्यदर्शी सुवीशः, जनपदसंयोजिका कीर्तीप्रकाशः, ज्योतिष् मयी इत्येते भागं गृहीतवन्तः।

 अर्णोस् पातिरि प्रतिभापुरस्कार : समर्पितः ।

    तृश्शिवपेरूर् सहृदयवेदिकायाः "अर्णोस् पातिरि-प्रतिभापुरस्कारः' सर्वकारीय पूर्वतनकार्यदर्शिना इ के भरत् भूषण् महाशेन डा. सी टि फ्रान्सीस् वर्याय समर्पितः   दश सहस्रमितरुप्यकाणि प्रशस्ति फलकञ्च पुरस्कारस्य स्वरूपम् ।

   महानुभावस्य संस्कृतभाषायाम् अन्यादृशपाण्डित्यं, संस्कृतभाषायै तेन कृतं समग्रं योगदानञ्च पुरस्कारसमर्पणाय हेतुभूतं मन्यते । तृश्शिवपुरस्थायां केरल-साहित्य अक्कादमि सभामन्दिरे पुरस्कारसमर्पणसभा प्रचालिता आसीत् ।

 दूरदर्शनस्य संस्कृतविभागस्य वार्ताहरः    नितीशभारद्वाजः दिवंगतः

  संस्कृतवार्ताक्षेत्रे प्रथितयशस्कः दूरदर्शनस्य संस्कृतविभागे वार्ताहरत्वेन च कार्यरतः युवविद्वान्  नितीशभारद्वाजः  ह्यः रात्रौ विवाहकार्यक्रमं परिसमाप्य उज्जयिनीतः प्रत्यागमनावसरे यानदुर्घटनायां दिवङ्गतः इति अतिदारुणा वार्ता । समेषां प्रीतिपात्रस्य नितीशस्य अकालमृत्युवार्तां श्रुत्वा समग्रः संस्कृतपरिवारः शोकसंविग्नमानसः वर्तते। तेन सहैव तदीयः भ्राता अपि दिवङ्गतः इत्यपि अतीव खेदस्य विचारः।

 डि गुकेशस्य पराजयः। 

सिङ्गपुरं> विश्वचतुरङ्गवीरतास्पर्धापरम्परायाः १२ तमे प्रतिद्वन्द्वे भारतस्य डि गुकेशः चीनस्य डिङ् लिरनेन पराजितः अभवत्। अनेन प्रतिद्वन्द्वेन उभावपि षडङ्कान् सम्पाद्य पुनरपि समस्थितिं पालयन्तौ वर्तेते। 

  ११ तमस्पर्धायां गुकेशः विजयं प्राप्य अग्रगामी आसीत्। परं स्पर्धाद्वयमवशिष्यते। यः ७. ५ अङ्कान् प्राप्नोति सः विश्वविजयी भविष्यति। अद्य विश्रान्तिदिनं भवति।

 सञ्जय मल्होत्रा आर् बी ऐ प्रशासक‌ः। 

नवदिल्ली> रिसर्व बैंक् ओफ् इन्डिया [आर् बी ऐ] संस्थायाः नूतनप्रशासकरूपेण वरिष्ठः ऐ ए एस् अधिकारी सञ्जय मल्होत्रा नियुक्तः। इदानीं सः केन्द्रसर्वकारस्य रवन्यूसचिवरूपेण कार्यनिरतः अस्ति। 

  वर्तमानीनः आर् बी ऐ प्रशासक‌ः शक्तिकान्तदासः अद्य सेवायाः विरमति। तस्य स्थाने अस्ति मल्होत्रावर्यस्य नियुक्तिः।

 जे सि डानियल् पुरस्कारः षाजि एन् करुणाय। 

अनन्तपुरी> मलयालचलच्चित्रमण्डलाय कृतम् आयुष्कालयोगदानं पुरस्कृत्य दीयमानाय जे सि डानियल् पुरस्काराय सुप्रसिद्धः निदेशकः षाजि एन् करुणः अर्होSभवत्। २०२३ तमवर्षस्य पुरस्कार एवास्मै दीयते।

  बहुषु  अन्ताराष्ट्रियमण्डलेषु षाजि एन् करुणस्य चलच्चित्राणि चर्चितान्यभवन्। केरलसर्वकारस्य परमोन्नता  चलच्चित्रबहुमतिः भवति जे सि डानियल् पुरस्कारः।

 सिरियाराष्ट्रं विमतैः गृहीतम्। 

राष्ट्रपतिः बाषर् अल् असदः रष्यां पलायितवान्।

सिरियानिग्रहणे आह्लादं प्रकटयन्तः विमताः। 

दमास्कसः> सिरियाराष्ट्रस्य राजधानी दमास्कसः स्वीयैः निगृहीतः इति सर्वकारविरुद्धविमतसंघेन हयात् तहरीर् अल् षाम् [एछ् टि एस्] इत्यनेन संघटनेन निगदितम्। नवम्बरमासस्य २७ तमे दिनाङ्के आरब्धस्य प्रशासनविरुद्धाक्रमणस्य ११ तमे दिने आसीदिदं प्रख्यापनम्। 

  राष्ट्रं परित्यक्तवान् राष्ट्रपतिः बाषर् अल् असदः सपरिवारः मोस्को प्राप्तवानिति  रूसीयवृत्तान्तहरैः प्रस्तुतम्। रष्यया असदाय अभयः दत्त इति सूच्यते। 

  असदः प्रशासनात् प्रतिलोमितः इति रविवासरे औद्योगिकदूरदर्शनमाध्यमेनैव विमतैः उद्घोषितम्। २० संवत्सरात्मकं असदशासनं समाप्तमिति ज्ञातवन्तः जनाः वीथीमागत्य आह्लादं प्रकटितवन्तः।

प्रयागराजे महाकुम्भमेलामहोत्सवे ४५ कोटि तीर्थयात्रिकाणां सहभागः भविष्यति - मन्त्री सूर्यप्रतापः शाहिः।

    प्रयागराजे महाकुम्भमेलामहोत्सवे ४५ कोटि तीर्थयात्रिकाणां सहभागः भविष्यति इति उत्तरप्रदेशस्य मन्त्री सूर्यप्रतापः शाहिः उक्तवान्।

     कार्यक्रमस्य अनुबन्धतया प्रयागराजे त्रिलक्षाधिकाः वृक्षाः रोपिताः। महोत्सवस्य समाप्तेः परम् अपि तेषां संरक्षणं सुनिश्चितं करणीयमिति सर्वकारेण सङ्कल्पितम् अस्ति इति मन्त्री अवदत्।

   ४५ कोटिभ्यः अधिकानां तीर्थयात्रिकाणाम्, संन्यासिनाम्, पर्यटकानां च स्वागताय अयं महोत्सवः सज्जः इति तेन उक्तम्। १२ संवत्सराणाम् अन्तराले युनेस्को-सांस्कृतिक- पैतृकत्वेन मानितः अयं महाकुम्भमहोत्सवः पुनः प्रयागस्य पवित्रभूमौ सम्पन्नः भविष्यति इत्यपि महोदयेन उक्तम्।

 विश्वचतुरङ्गक्रीडा - गुकेषः विजयेन अग्रे। 

क्रीडामध्ये डि गुकेशः [वामभागे] 

सिंगपुरं> विश्वचतुरङ्गक्रीडायाः अन्तिमचक्रस्य ११ तमे प्रतिद्वन्द्वे भारतस्य क्रीडकः डि गुकेशः निर्णायकविजयं प्राप्य अग्रगामी अभवत्। वर्तमानकालीनः विश्ववीरः चीनीयः डिङ् लिरनः क्रीडायाः २९ तमे पदे पराजयम् अङ्गीकृतवान्। 

   १४ चरणयुक्तायांक्रीडायां ११ चरणेषु समाप्तेषु गुकेशः ६ - ५ इति अङ्कक्रमेण अग्रे वर्तते। यः प्रथमं ७. ५ अङ्कान् सम्पादयिष्यति सः विश्वविजयी भविष्यति। १२ तमक्रीडा अद्य सम्पत्स्यते।

नवदिल्ल्यां चत्वारिंशदधिकविद्यालयेषु विसस्फोटकभीषा

     नवदिल्ल्यां चत्वारिंशदधिकविद्यालयेषु विसस्फोटकभीषा। रविवासरे ११.३८ वादने एव विस्फोटकः स्थापितः इति ई-पत्रद्वारा भीषासन्देशः विद्यालयेषु आगतः। अनेन कारणेन प्रातः विद्यालये आगतान् छात्रान् गृहं प्रति प्रेषणाय निर्देशः दत्तः। दिल्ली- आरक्षकदलेन अस्मिन् घटनायाम् अन्वेषणं समारब्धम्।

देशे ८५ नूतनकेंद्रीय-विद्यालयानां संस्थापनाय केन्द्र-सर्वकारस्य निर्णयः।

   देशे ८५ नूतनानां केंद्रीय-विद्यालयानां संस्थापनाय केन्द्र-सर्वकारेण निर्णयः कृतः। अनेन सह २८ नवोदय-विद्यालयानाम् आरम्भः अपि निश्चितः। अयं निर्णयः प्रधानमन्त्रिणः नरेन्द्रमोदिनः अध्यक्षतायाम् सम्पन्ने आर्थिककार्य-मन्त्रिमण्डल-समितेः सभायाम् अभवत्।

  नूतनस्य संस्थापनेन सह वर्तमानानाम् विकासाय ५८७२ कोटि-रूप्यकाणि व्ययीक्रियन्ते। वर्तमान-मानदण्डानुसारम् एकस्मिन् केंद्रीय-विद्यालये ६३ जनेभ्यः कर्मलब्धिः भविष्यति। विद्यालयस्य विपुलीकरणेन ३३ नूतन-कर्मस्थानानि भविष्यन्ति। ८५ नूतन-केंद्रीय-विद्यालयानां संचालनेन ८२,५६० छात्रेभ्यः प्रयोजनानि लप्स्यन्ते।

 नासायाः 'आर्टेमिस् योजना' विलम्बायते। 

वाषिङ्टणः> अर्धशतकानन्तरं मनुष्यं पुनरपि चन्द्रमण्डलं प्रापयितुं नासासंस्थायाः अभिमानपरियोजनायाः 'आर्टेमिस्' नामिकायाः विलम्बः भविष्यति। बहिराकाशयात्रिकान् चान्द्रभ्रमणपथं प्रापयितुमुद्दिष्टा 'आर्टेमिस् - २'  योजना २०२६ एप्रिल् यावत् दीर्घिता इति नासया निगदितम्। २०२५ सेप्टम्बर् आसीत् पूर्वं निश्चितः कालः।

 अग्निप्रकाण्डात् पुनरुज्जनितः 'नोत्रदाम्' आराधनालयः अद्य उद्घाट्यते। 

पारीस्> पारीसे विश्वप्रसिद्धः नोत्रदाम् क्रैस्तवाराधनालयः नवीकरणानन्तरम् शनिवासरे उद्घाट्यते। २०१९ तमे वर्षे दुरापन्नन अग्निप्रकाण्डेन  विनाशिते देवालये पञ्च वर्षाभ्यामनन्तरं गायकसंघस्य गानमुन्नेष्यति। आमन्त्रितैः १५०० अतिथिभिस्सह मुख्यपुरोहितः आर्च् बिषप् लोरन्ट् उल्रिच् देवालयस्य अन्तः प्रवेक्ष्यति। 

  रविवासरे प्रवृत्तमानस्य उद्घाटनदिव्यबलेः बलिपीठप्रतिष्ठाकार्यक्रमस्य चानन्तरं सामान्यजनानां प्रवेशः साध्यः भविष्यति। ८६० संवत्सराधिकं पुरातने अस्मिन् देवालये अग्निप्रकाण्डात्पूर्वं प्रतिदिनं १. ३कोटि जनाः सन्दर्शनं कृतवन्तः।

  शनिवासरे सम्पद्यमाने प्रवेशकार्यक्रमे यू एस् राष्ट्रस्य नियुक्तराष्ट्रपतिः डोनाल्ड ट्रम्पः, युक्रेनराष्ट्रपतिः व्लादिमिर् सेलन्स्की इत्यादयः फ्रञ्च राष्ट्रपतेः इम्मानुवल् मक्रोणस्य आमन्त्रणं स्वीकृत्य देवालयं प्राप्स्यन्ति।

 महाराष्ट्रे फड्नविसः प्रशासनम् अधिकारं प्राप्तम्। 

देवेन्द्र फड्नविसः शपथवाचनं करोति।

मुम्बई> महाराष्ट्रे मुख्यमन्त्रिरूपेण देवेन्द्र फड्नविसः शपथवाचनं कृतवान्। एकनाथ षिन्डे , अजित पवारश्च उपमुख्यमन्त्रिरूपेण च अधिकारं स्वीकृतवन्तौ। ह्यः सायं आसाद् क्रीडाङ्कणे समायोजिते प्रौढगम्भीरे कार्यक्रमे राज्यपालस्य सि पि राधाकृष्णस्य पुरतः एव सर्वे शपथवाचनमकुर्वन्। 

  प्रधानमन्त्री नरेन्द्रमोदी, गृहमन्त्री अमित शाहः, इतरे केन्द्रमन्त्रिणः, राज्यमुख्यमन्त्रिणः, मुकेष् अम्बानी, नोयल् टाटा इत्यादयः व्यवसायप्रमुखाः, सच्चिन् टेण्टुल्करः, षारूखानः इत्यादयः विशिष्टपुरुषाश्च कार्यक्रमेSस्मिन् सन्निहिताः आसन्।

 दृश्यविस्मयैः सह नाविकदिनोत्सवः सम्पन्नः। 

कोच्ची मध्ये सम्पन्ने नौसेनादिनोत्सवे प्रदर्शितं प्रकटनम्। 

कोच्ची> नौसेनायाः कोच्चीकेन्द्रे विविधैः सेनाभ्यासैः नाविकदिनोत्सवः सम्पन्नः। 

  रोमियो उदग्रयानं, अमेरिकातः क्रीतानि पि -८ ऐ युद्धविमानानि च अभिव्याप्य भारतस्य नौसेनाशक्तिं समुद्घोषितानि विस्मयदृश्यानि आसन्। नौसेनायाः दक्षिणप्रान्तीयाधिकारी वैस् अड्मिरल् वि श्रीनिवासः, नौसेना अधिकारिणः, आमन्त्रिताः अतिथयश्च सन्निहिताः आसन्।

 यू एन् मध्ये पालस्तीनानुकूलं वादविषयपत्रं भारतेन अनुमोदितः। 

अधिनिवेशितप्रदेशेभ्यः इस्रयेलेन अपयातव्यम्। 

न्यूयोर्क्> पूर्वजरुसलेमम् अभिव्याप्य १९६७ तमवर्षादारभ्य इस्रयेनेन अधिनिवेशितेभ्यः पालस्तीनस्य भूप्रदेशेभ्यः तद्राष्ट्रम् अपनीतव्यमिति आवश्यकं यू एन् संस्थायाः  वादपत्रमनुमोद्य भारतं मतदानमदात्। पश्चिमेष्यायां समग्रा नीतियुक्ता शाश्वती च शान्तिः अनेन वादपत्रेण कांक्षते। 

 सेनगलराष्ट्रेण आनीतं वादपत्रं सामान्यसभायाः १९३ अङ्गराष्ट्रेषु १५७ राष्ट्रैः अनुकूलितम्। यू एस्, इस्रयेलः, अर्जेन्टीना इत्यादिभिः अष्टराष्ट्रैः प्रतिकूलितम्।

 महाराष्ट्रे फड्नविसः मुख्यमन्त्री; अद्य शपथसमारोहः। 

देवेन्द्र फड्नविसः। 

मुम्बई> महाराष्ट्रे दशदिनात्मकस्य राजनैतिकानिश्चितत्वस्य विरामः। भा ज पा नेता देवेन्द्र फड्नविस् इत्यस्य नेतृत्वे नूतनसर्वकारः गुरुवासरे अधिकारं प्राप्स्यति। आसाद् क्रीडाङ्कणे सायं सार्धपञ्चवादने शपथसमारोहः भविष्यति। 

  शिवसेना नेता भूतपूर्वमुख्यमन्त्री च एकनाथ षिन्डे, एन् सि पि नेता अजित पवारः च उपमुख्यमन्त्रिणौ भविष्यतः।

   ५४ वयस्कः देनेन्द्र फड्नविसः तृतीयवारमेव महाराष्ट्रस्य मुख्यमन्त्रिपदमारोहति। ह्यः प्रवृत्ते भाजपासदस्यानां मेलने सः विधानसभानेतृरूपेण चितः।