महाराष्ट्रे फड्नविसः प्रशासनम् अधिकारं प्राप्तम्। 

देवेन्द्र फड्नविसः शपथवाचनं करोति।

मुम्बई> महाराष्ट्रे मुख्यमन्त्रिरूपेण देवेन्द्र फड्नविसः शपथवाचनं कृतवान्। एकनाथ षिन्डे , अजित पवारश्च उपमुख्यमन्त्रिरूपेण च अधिकारं स्वीकृतवन्तौ। ह्यः सायं आसाद् क्रीडाङ्कणे समायोजिते प्रौढगम्भीरे कार्यक्रमे राज्यपालस्य सि पि राधाकृष्णस्य पुरतः एव सर्वे शपथवाचनमकुर्वन्। 

  प्रधानमन्त्री नरेन्द्रमोदी, गृहमन्त्री अमित शाहः, इतरे केन्द्रमन्त्रिणः, राज्यमुख्यमन्त्रिणः, मुकेष् अम्बानी, नोयल् टाटा इत्यादयः व्यवसायप्रमुखाः, सच्चिन् टेण्टुल्करः, षारूखानः इत्यादयः विशिष्टपुरुषाश्च कार्यक्रमेSस्मिन् सन्निहिताः आसन्।

 दृश्यविस्मयैः सह नाविकदिनोत्सवः सम्पन्नः। 

कोच्ची मध्ये सम्पन्ने नौसेनादिनोत्सवे प्रदर्शितं प्रकटनम्। 

कोच्ची> नौसेनायाः कोच्चीकेन्द्रे विविधैः सेनाभ्यासैः नाविकदिनोत्सवः सम्पन्नः। 

  रोमियो उदग्रयानं, अमेरिकातः क्रीतानि पि -८ ऐ युद्धविमानानि च अभिव्याप्य भारतस्य नौसेनाशक्तिं समुद्घोषितानि विस्मयदृश्यानि आसन्। नौसेनायाः दक्षिणप्रान्तीयाधिकारी वैस् अड्मिरल् वि श्रीनिवासः, नौसेना अधिकारिणः, आमन्त्रिताः अतिथयश्च सन्निहिताः आसन्।

 यू एन् मध्ये पालस्तीनानुकूलं वादविषयपत्रं भारतेन अनुमोदितः। 

अधिनिवेशितप्रदेशेभ्यः इस्रयेलेन अपयातव्यम्। 

न्यूयोर्क्> पूर्वजरुसलेमम् अभिव्याप्य १९६७ तमवर्षादारभ्य इस्रयेनेन अधिनिवेशितेभ्यः पालस्तीनस्य भूप्रदेशेभ्यः तद्राष्ट्रम् अपनीतव्यमिति आवश्यकं यू एन् संस्थायाः  वादपत्रमनुमोद्य भारतं मतदानमदात्। पश्चिमेष्यायां समग्रा नीतियुक्ता शाश्वती च शान्तिः अनेन वादपत्रेण कांक्षते। 

 सेनगलराष्ट्रेण आनीतं वादपत्रं सामान्यसभायाः १९३ अङ्गराष्ट्रेषु १५७ राष्ट्रैः अनुकूलितम्। यू एस्, इस्रयेलः, अर्जेन्टीना इत्यादिभिः अष्टराष्ट्रैः प्रतिकूलितम्।

 महाराष्ट्रे फड्नविसः मुख्यमन्त्री; अद्य शपथसमारोहः। 

देवेन्द्र फड्नविसः। 

मुम्बई> महाराष्ट्रे दशदिनात्मकस्य राजनैतिकानिश्चितत्वस्य विरामः। भा ज पा नेता देवेन्द्र फड्नविस् इत्यस्य नेतृत्वे नूतनसर्वकारः गुरुवासरे अधिकारं प्राप्स्यति। आसाद् क्रीडाङ्कणे सायं सार्धपञ्चवादने शपथसमारोहः भविष्यति। 

  शिवसेना नेता भूतपूर्वमुख्यमन्त्री च एकनाथ षिन्डे, एन् सि पि नेता अजित पवारः च उपमुख्यमन्त्रिणौ भविष्यतः।

   ५४ वयस्कः देनेन्द्र फड्नविसः तृतीयवारमेव महाराष्ट्रस्य मुख्यमन्त्रिपदमारोहति। ह्यः प्रवृत्ते भाजपासदस्यानां मेलने सः विधानसभानेतृरूपेण चितः।

 गान्दर्बल आक्रमणकारिषु एको भीकरः हतः। 

श्रीनगरं> ओक्टोबरमासे जम्मु काश्मीरे गान्दर्बलप्रदेशे निर्माणकर्मकराणां वासशिबिरम् आक्रम्य वैद्यमभिव्याप्य सप्त जनानां हन्तृषु भीकरेषु एकः सुरक्षासेनया हतः। गतदिने दच्चिगामवनक्षेत्रे प्रवृत्ते प्रतिद्वन्द्वे कुलगामवासी जुनैद् अहम्मदभट्टनामकः भीकर एव हतः।

 चीनं प्रति सौहृदे उत्कर्षो जातः - भारतविदेशकार्यमन्त्री। 

नवदिल्ली> भारतचीनयोः सीमाविवादाः समीपकालसैनिकनयतन्त्रचर्चाभिः परिहृताः इति भारतस्य विदेशकार्यमन्त्री एस् जयशङ्करः। उभयोरपि राष्ट्रयोः परस्परसंबन्धे अपि उत्कर्षः जातः इति तेनोक्तम्। लोकसभायां सविशेषप्रस्तुतिं  क्रियमाणः आसीत् सः।

  २०२० तमे 'गाल्वन्' संघर्षस्य हेतुः चीनेन कृतं प्रकोपनमासीत्। चीनस्य आक्रमणं प्रतिरोद्धुं भारतसेनया कृतः उद्यमः प्रशंसामर्हति। चीनेन सह सीमाविवादेषु शाश्वतपरिहाराय भारतं प्रतिज्ञाबद्धमिति जयशङ्करेण प्रस्तुतम्।

 भूतपूर्वविधानसभासदस्यस्य पुत्रस्य आश्रितनियुक्तिः

सर्वोच्चन्यायालयेनापि निरस्ता। 

सर्वकारं प्रति कठिनविमर्शः।

नवदिल्ली> केरले चेङ्ङन्नूर् विधानसभासदस्यरूपेण वर्तमाने सति मृत्युं प्राप्तस्य के के रामचन्द्रन् नायरस्य पुत्रस्य आश्रितनियुक्तिः  सर्वोच्चन्यायालयेनापि निरस्ता। २०१८ तमे वर्षे    पुत्राय आर् प्रशान्ताय अविद्यमानं पदं 'सूपर् न्यूमररि' रूपेण [Super neumarary] सृष्ट्वा सामान्यप्रवृत्तिविभागे दत्ता 'असिस्टन्ट् एन्जिनीयर्' पदनियुक्तिः २०२१ तमे  राज्योच्चन्यायालयेन निरस्ता आसीत्। तदुपरि केरलसर्वकारेण प्रशान्तेन च  सर्वोच्चन्यायालये पुनर्विचारप्रार्थना समर्पिता। तां प्रार्थनां निरस्य राज्योच्चन्यायालयस्य विधेः साधुता कल्पिता। 

  सर्वकारस्य सविशेषाधिकारमुपयुज्यैव नियुक्तिः दत्ता इति वादं निरस्यमाणेन नीतिपीठेन एतादृशप्रकरणेषु तादृशाधिकारः न प्रयोक्तव्यः इति उक्तम्। सर्वकारसेवकानाम् आश्रितेभ्यः एव आश्रितनियुक्तिः विवक्षिता सदस्यः सर्वकारसेवकः नास्तीति च नीतिपीठेन निरीक्षितम्।

 राजवीथ्यां  बस् यान-कार् यानसंघट्टनं - पञ्च वैद्यकछात्राः मृताः। 

दुर्घटनायां पूर्णतया भग्नं कार् यानम्। 

आलप्पुष़ा> केरले आलप्पुष़ा जनपदे नगरसमीपं राजवीथ्यां  के एस् आर् टि सि बस् यानं प्रति ११ वैद्यकीयछात्राः सञ्चरतः कार् यानस्य संघट्टनेन ५ वैद्यकीयछात्राः मृताः; अन्ये तीव्रेण आहताः।   वैद्यककलालयस्य आतुरालये परिचर्यायां वर्तमानेषु आहतेषु एकस्य अवस्था गुरुतरा वर्तते।

  सोमवासरस्य रात्रौ अतिवृष्टिसमये आसीत् दुर्घटना।  चलच्चित्रदर्शनाय प्रस्थिताः  ११ वैद्यकीयछात्रैः सञ्चरत् यानं नियन्त्रणं विनश्य अभिमुखमागच्छत् बस् यानं घट्टितमासीत्।

  सर्वे आलप्पुष़ा वैद्यककलाशालायां प्रथमवर्षछात्राः भवन्ति। आयुष् षाजी [आलप्पुष़ा], श्रीदीप वत्सन् [पालक्काट्], देवानन्दः [मलप्पुरं], मुहम्मद अब्दुल् जब्बार् [कण्णूर्], मुहम्मद इब्राहिमः [लक्षद्वीपः] इत्येते अकालमृत्युं प्राप्तवन्तः सुहृदः। 

 केरले उत्तरजनपदेषु अतिवृष्टेः सम्भावना। 

अद्य चतुर्णां शैक्षिकसंस्थानां विरामः। 

अनन्तपुरी> फैन्जल् चक्रवातः न्यूनमर्दरूपं प्राप्य उत्तरकेरलस्य कर्णाटकस्य च उपरिभागेन आरबसमुद्रं लक्ष्यीकृत्य सञ्चरतीत्यतः उत्तरकेरलजनपदेषु कर्णाटके च अतितीव्रवृष्टिः प्रोक्ता पर्यावरणविभागेन। 

  कण्णूर् कासरगोड् जनपदयोः ओरन्जजागरूकता, मलप्पुरं वयनाट् कोष़िक्कोट् जनपदेषु पीतजागरूकता च प्रख्यापिता। 

  तृश्शुर् कासरगोड् मलप्पुरं जनपदस्थानां शैक्षिकसंस्थानां कुजवासरे  विरामः प्रख्यापितः। परन्तु पूर्वनिश्चितानां परीक्षाणाम् अभिमुखानां च विरामः न बाधते।

 तिरुवण्णामलै मध्ये मृत्स्खलनं - ७ जनाः अप्रत्यक्षाः। 

चेन्नै> तमिलनाटुराज्ये तिरुवण्णामलै प्रदेशे अतिवृष्ट्या मृत्स्खलनं प्रवृत्तम्।सप्त जनाः अप्रत्यक्षाः इति सूच्यते। फेन्चल चक्रवातस्य अंशतया प्रवृत्तायामतिवृष्ट्यामेषा दुर्घटना जाता।

 गासायाम् इस्रयेलस्य आक्रमणम् - १५ मरणानि। 

केय्रो> गासायाः मध्य-उत्तरप्रदेशेषु रविवासरे इस्रयेलेन कृते बोम्बाक्रमणे १५ जनाः हताः। नुसैरत्, गासा सिटि, राफा, जबलिया, बेय्त् लहिया इत्यादिषु प्रदेशेषु आसीदाक्रमणम्। 

  एतदाभ्यन्तरे, गासातः निगृहीताः द्वौ पालस्तीनीयौ इस्रयेलीयकारागारे मृताविति  कारागृहवासिनां मोचनाय प्रवृत्तमानेन संघटनेन निगदितम्। अनेन युद्धारम्भात् परं इस्रयेलीयकारागारे मृतानां पालस्तीनीयानां संख्या ४७ अभवत्। 

  १४ मासैः अनुवर्तमानस्य  इस्रयेल्-हमास युद्धस्य समाप्तये ईजिप्तस्य राजधानी केय्रो इत्यत्र शान्तिचर्चा प्रचलन्ती अस्ति।  बन्धितानां मोचनं, निगृहीतानां प्रतिदानम् इत्यादयोSपि चर्चाविषयाः सन्ति।

 वत्तिक्काने विश्वसर्वधर्मसंसद्।

श्रीनारायणगुरुसन्देशस्य अस्मिन् काले नितरां प्रसक्तिः - मार्पापावर्यः। 

विश्वसर्वधर्मसंसदि अनुग्रहभाषणं कृतवते मार्पापावर्याय शिवगिरिमठम् अध्यक्षः उपहारं समर्पयति।  

वत्तिक्कान् सिटी> आविश्वं जनेषु, राष्ट्रेषु मिथः असहिष्णुतायां वर्धितायां श्रीनारायणगुरुसन्देशानां नितरां प्रसक्तिः अद्यत्वे अस्तीति फ्रान्सिस् मार्पापावर्यः उक्तवान्। शिवगिरिमठस्य नेतृत्वे वत्तिक्काने आयोज्यमाने विश्वसर्वधर्मसंसदि भाषमाणः आसीत् मार्पापावर्यः। 

  भारतस्य सामाजिकपरिष्कर्तृ-आध्यात्मिक-सन्न्यासिवर्येषु प्रमुखेन श्रीनारायणगुरुणा आलुवा अद्वैतश्रमे आयोजितस्य सर्वधर्मसम्मेलनस्य शताब्द्युत्सवस्य अंशतया वत्तिक्काने अगस्तीरियन् सभागारे आयोज्यमाने सम्मेलने विविधराष्ट्रेभ्यः १८० प्रतिनिधयः भागं गृह्णन्ति।

 फिंजालचक्रवातः स्थले स्पृष्टः, चन्नै नगरे तीव्रा वृष्टिः, तमिळ्नाटुमण्डले महाजागरूकता।

   फिंजालचक्रवातः तमिळनाटु राज्ये पुदुच्चेरिमण्डले स्थले स्पृष्टम्। चेन्नैनगरे तथा तमिळ्नाटुराज्यस्य पूर्वसागरसीमायां अतीतीव्रं वर्षं प्रवर्तमानम् अस्ति।

   तमीळ्नाट् राज्यस्य सागरतटीयेषु सप्तजनपदेषु अतीवतीव्रवृष्टेः सम्भावनया, वातावरणविज्ञानविभागेन "लोहितसावधानता" इति सूचना प्रकाशिताऽभवत्। चेन्नै, तिरुवल्लूर, काञ्चीपुरं, कळ्ळूरिच्छि, कडलूर, पुदुच्चेरीमण्डलेषु वर्षा निरन्तरं प्रवर्तमाना वर्तते।

अगामि चतुर्विंशति होरासु दक्षिणान्ध्रप्रदेशे उत्तरतटीयप्रदेशे च अतीवतीव्रवृष्टेः सम्भावनाऽस्ति। तमीळ्नाट् राज्यस्य निम्नभागेषु जलप्लावनं सम्भाव्यमिति कारणेन सर्वेभ्यः नागरिकेभ्यः विशेषसावधानता आदिष्टा।

  सुस्मितो भूत्वा जीवने प्रतिकूलावस्थां तर्तुं शक्यते- अरुण् तथागतः।

  विश्वसैकिल्-सञ्चारी अरुण् तथागतः स्वस्य द्विचक्रिकायां पर्यटनं कुर्वन् अस्ति। तन्मध्ये सम्प्रतिवार्तायाः कृते पञ्चनिमेषस्य संवादाभिमुखं दत्तवान्। स्वानुभवः मनसि निधाय तेन एवम् उक्तम् - 

   सर्वे जना: द्विचक्रिकायाः यात्रायां समतलतः अधिकं काठिन्यम् आरोहात् बिभ्रान्ति। किन्तु, मम यात्रायाम् आरोहे आगते, सैकिल्-यानात् अवतीर्य हस्तेन यानं प्रचाल्य अग्रम् आरोहामि। तदा मम शरीरं विश्रान्तिं प्राप्नोति, चक्रचालन-गमनरूपात्  परिवर्तनं भवति।

   यत्र उन्नतिः अस्ति, तत्र अवश्यं निम्नता अपि स्यात्। एषः जीवनस्य सर्वासु कठिनासु अवस्थासु स्मर्तव्यः सिद्धान्तः। अत एव मार्गोन्नतेः अहं न बिभेमि। यदि उन्नतेः तरणं याने उपविश्य  क्रियते तर्हि शीघ्रं गमिष्यामि। तदा पञ्च वा षट् किलेमीट्टर् वेगः लभते। यदि हस्तेन  यानस्य प्रचालनं कृत्वा पद्भ्यां  गमिष्यामि तर्हि  प्रवेगः त्रयः किलोमीट्टर् लभते, अत्र भेदः अल्प एव भवति।

   मम मतानुसारं, दीर्घदूर-सैकिल्-यात्रिकेषु अहं एव अस्मि यः आरोहं हस्तेन चालयति। इयं मम शैली, विषयेस्मिन् अहं कदापि लज्जां न अनुभवामि। जीवनस्य प्रतिकूलावस्थाः अपि स्मितं धृत्वा, स्वशैलीं अपनय्य विजयः प्राप्तुं शक्यते इति अरुण् तथागतेन उक्तम् ॥

 युक्रेनस्य विद्युन्निलयानि लक्ष्यीकृत्य रष्यायाः आक्रमणम्। 

दलक्षाधिकेषु गृहेषु विद्युत् स्थगिता। 

कीव्> शैत्यकाले आरब्धे युक्रेनस्य विद्युन्निलयानि लक्ष्यीकृत्य रष्या आक्रमणं शक्तमकरोत्। द्विशताधिकानि अग्निशस्त्राणि ड्रोणयन्त्राणि च उपयुज्य कृतेन आक्रमणेन दलक्षाधिकेषु गृहेषु विद्युत् स्थगिता। 

  महद्विनाशकारी 'क्लस्टर्बोम्ब्' आक्रमणमासीत् रष्यया कृतमिति युक्रेनस्य राष्ट्रपतिना व्लादिमिर् सेलन्स्कीवर्येण आरोपितम्। रष्य-युक्रेनयुद्धस्य तृतीयवार्षिके समागते युक्रेनस्य ऊर्जस्रोतसः अर्धांशः विनाशितः।

 दिल्ल्यां स्फोटनं - न जनापायः। 

नवदिल्ली> दिल्ल्याः उत्तरपश्चिमप्रदेशे रोहिणिनामके प्रशान्तविहारमिति स्थाने मासैकामन्तरं स्फोटनं प्रवृत्तम्। तत्रोपस्थितायाः कस्याश्चन द्विचक्रिकायाः चालकस्य लघुव्रणः अभवत् इत्येतततिरिच्य  कोSपि जनापायः नाभवत्। 

  गुरुवासरे प्रभाते ११. ३० वादने वीथीपार्श्वे  आसीत् उग्रशब्देन  स्फोटनम्। जनाः सम्भ्रान्ताः जाताः। रक्षिगणः अग्निक्षासेना च घटनास्थानं प्राप्य अन्वेषणमारभत।

विश्वस्य श्रेष्ठतमसंस्कृते: आधार: संस्कृतं - राज्यपाल: गुरमित् सिंहः।

राज्यपालेन उत्तराखण्डसंस्कृतविश्वविद्यालयस्य 30 छात्रेभ्यः स्वर्णपदकं प्रदत्तम्।

दीक्षान्तसमारोहे 3047 छात्रेभ्यः उपाधयः प्रदत्ताः।

वार्ताहर:-कुलदीपमैन्दोला।हरिद्वारम्।

      उत्तराखण्डसंस्कृतविश्वविद्यालयस्य एकादशतमे दीक्षान्तसमारोहे माननीयराज्यपालः च विश्वविद्यालयस्य कुलाधिपतिः लेफ्टिनेंटजनरलः श्रीगुरमीतसिंहः (सेवानिवृत्तः) त्रिंशत् स्नातकपरास्नातकछात्रेभ्यः स्वर्णपदकं प्रदत्तवान्। तदनन्तरं विश्वविद्यालयस्य विविधविभागेषु एकविंशतिछात्रेभ्यः विद्यावारिधि-उपाधिं प्रदाय सम्मानितवान्।

    दीक्षान्तसमारोहस्य अध्यक्षतां कुर्वन् राज्यपालः श्रीगुरमीतसिंहः उक्तवान् यत् कस्यापि राष्ट्रस्य आत्मा तस्य संस्कृतिः अस्ति। संस्कृतिः यावत् जीवति सुरक्षितं च भवति, तावत् राष्ट्रम् अपि जीवति सुरक्षितं च भवति। विश्वस्य सर्वासु संस्कृतिषु प्राचीनतमं श्रेष्ठं च भारतीया संस्कृतिः अथवा वैदिकसंस्कृतिः अस्ति। अस्याः संस्कृत्याः आधारः संस्कृतभाषा अस्ति। संस्कृतभाषां विना भारतीयसंस्कृतिः च भारतीयसंस्कृतिं विना च भारतस्य कल्पना अपि

 आन्तमाने महानौकायाः पञ्चटण्  उन्मादकवस्तूनि निगृहीतानि।

 वङ्गमहासमुद्रे भारतीयतीरसेनया उन्मादकवस्तूनि निगृहीतानि। आन्तमान्द्वीपसमीपे मत्स्यबन्धननौकायाः ५५०० किलो मितानि 'मेत्ता फेट्टमिन्' नाम उन्मादकवस्तुनि निगृहितानि। घटनायामस्यां नौकायाम् वर्तिताः षट् मान्मर् स्वदेशीयाः तीरदेशसेनया निगृहीताः। निगृहीतानां उन्मादकवस्तूनाम् अन्ताराष्ट्रविपण्यां कोटिशः मूल्यानि सन्ति इति प्रतिवेदनमस्ति। धटनायामस्यां विशदम् अन्वेषणं प्रचलत् अस्ति।