सुपर्-

पवर्-पदवीं प्रति भारतस्य पात्रता अस्ति इति पुतिनः।

    विश्वस्य 'सुपर्-पवर्'-राष्ट्राणां सूचीमध्ये भारतस्य स्थानं भवितुम् अर्हता अस्ति इति रष्य देशस्य राष्ट्रपतिः व्लादिमीर् पुतिनः अवदत्। अन्या-राष्ट्रैः सह तुलनायां शीघ्रतया एव भारतस्य अर्थव्यवस्थायाः विकासः सञ्जातः अस्ति इति सोच्ची-स्थे वाल्दाय्-चर्चा-मञ्चे पुतिनः उक्तवान्।

    विश्वस्य अधिकजनसंख्यायुक्तं राष्ट्रं भारतम् इत्यनेन कारणेन सह रष्यस्य द्विपक्षीयसम्बन्धाः दृढाः सन्ति इति च पुतिनः सूचितवान्। प्रत्येकं क्षेत्रे, विशेषतया सुरक्षा-रक्षा क्षेत्रयोः, सहकार्येण महतीं प्रगतिं सम्पादयितुम् शक्नुमः इति तेन उक्तम्।

 केन्द्रीय संस्कृतविश्वविद्यालयस्य 'युवा २०२४' समारब्धा। 

तृश्शूरं>  दिल्ली आस्थानीयस्य केन्द्रीय संस्कृतविश्वविद्यालयस्य [CSU] दक्षिणक्षेत्रीया अखिलभारतीय क्रीडा-सांस्कृतिक-शैक्षणिकस्पर्धा [युवा २०२४] पुरनाट्टुकरास्थे गुरुवायूर् परिसरे समारब्धा। नवम्बर् सप्तमदिनाङ्कतः दशमदिनाङ्कपर्यन्तम् आयोज्यमानः अयं समारोहः  भारतस्य भूतपूर्वः 'बास्कट् बोल्' दलनायकः सुभाष् जे षेणाय् वर्यः कायिकदीपं प्रज्वाल्य उद्घाटनमकरोत्। 

  CSU दिल्लीस्थः मदनमोहन झा ध्वजारोहणमकरोत्। ए एन् विजेन्द्र रावः आशंसां समार्पयत्। गुरुवायूर परिसरनिदेशकः प्रोफ. के के षैनः स्वागतं व्याजहार।

 शबरिगिर्यां दाहजलसहिताः सुविधाः सज्जीकरिष्यन्ति। 

पत्तनंतिट्टा> अस्य वर्षस्य शबरिगिरितीर्थाटलकाले भक्तानां क्षेमार्थं दाहमपनेतुम् उष्णजलदानसहिताः सुविधाः सज्जीकर्तुं देवस्वं बोर्ड् संस्थया निर्णीतम्। 

   तीर्थाटकानां कृते नालिकया 'कियोस्क्' उपकरणेन च उष्णजलं पानाय प्रदास्यति। बिस्कट् रूपेण लघुभोज्यमपि दास्यति। २००० स्टील् निर्मितकूपिषु  शुण्ठीजलं गिर्यारोहणसमये भक्तेभ्यः  प्रदास्यति। प्रत्यागमने कूप्यः प्रतिदातव्याः। 

  पम्पायां महिलेभ्यः विशिष्य  विश्रान्तिकेन्द्राणि भविष्यन्ति। निलक्कल् स्थाने १०४५ शौचालयाः सज्जीकृताः। निलक्कल्, सन्निधानं,पम्पा स्थानेषु    १६,००० भक्तानां कृते एककाले  आस्तरणाय सुविधा कृता।

 अलिगढ विश्वविद्यालयस्य न्यूनपक्षाश्रितत्वाय हानिः नास्ति - सर्वोच्चन्यायालयः। 

अन्तिमनिर्णयाय स्थिरपीठं प्रासृजत्। 

नवदिल्ली> नियमसंहितया स्थापितम् इत्यनेन विद्याभ्याससंस्थायाः न्यूनपक्षपदस्वभावः न हन्यते इति सर्वोच्चन्यायालयस्य सप्ताङ्गनीतिपीठस्य भूरिपक्षविधिः। भारतसंसदा निर्मितस्य नियमस्य आधारेण नियन्त्रमाणः इति कारणेन अलिगढ् विश्वविद्यालयस्य न्यूनपक्षाश्रितत्वं नास्तीति १९६८ तमवर्षस्य पञ्चाङ्गयुतनीतिपीठस्य विधिः नूतनविधिना निष्प्रभो जातः। न्यूनपक्षसंस्था वा न वा इति निर्णेतुं मानदण्डान् प्रकल्प्य अन्तिमनिर्णयाय स्थिरनीतिपीठं प्रकरणं प्रासृजत्। 

   उत्तरप्रदेशे अलिगढे १८७५ तमे वर्षे 'मुहम्मदन् आङ्लो ओरियन्टल् कोलेज्' इति नाम्ना स्थापिता संस्था १९२० तमे वर्षे ब्रिटनस्य शासनकाले नियमानुसारं 'अलिगढ मुस्लिम्  विश्वविद्यालयः' इत्यभवत्। 

  अलिगढ केन्द्रीयविश्वविद्यालयः भवतीत्यतः न्यूनपक्षपदं दातुं  न शक्यते इति १९६८ तमे वर्षे पञ्चङ्गयुतपीठेन विहितम्। १९८१ तमे नियमपरिष्करणेन केन्द्रसर्वकारः न्यूनपक्षपदमदात्। किन्तु २००६ मध्ये अलहबाद् उच्चन्यायालयेन तन्निरस्तः।

 कपोलसङ्कोचः - सुनितायाः स्वास्थ्यविषये आशङ्का। 

बहिराकाशनिलये पाकं कुर्वन्तौ सुनीता विल्मोरः च। तत्र सुनितायाः आकारमेव आशङ्कानिदानम्। 

> स्टार् लैनर् इति बहिराकाशपेटकस्य साङ्केतिकदोषः अभवत् इत्यस्मात् अन्ताराष्ट्र बहिराकाशनिलयम् अधिवसन्तौ सुनिता विल्यंसः, बुच् विल्मोरः इत्येतयोः स्वास्थ्यविषये वैद्यैः आशङ्का प्रकटिता। अद्यत्वे बहिरागतेषु तयोः छायाचित्रेषु सुनितायाः कपोलद्वयं अत्यधिकं सङ्कोचेन दृश्यते इति आशङ्कायाः निदानम्।

      दीर्घकालीनस्य बहिराकाशवासस्य फलमेतदिति सूच्यते। अवश्यानुसारम् ऊर्जं [Calorie] न लभते इति स्यात् कारणमिति वैद्येषु अन्यतमेन डा विनय गुप्तेन सूचितम्। किन्तु आशङ्का आधाररहिता इति नासया प्रस्तुतम्। 

  केवलम् अष्ट दिनानां  बहिराकाशनिलयवासं कल्पितौ तौ अद्यावधि १५३ दिनानि तत्र यापितानि। द्वावपि २०२५ फेब्रुवरि मासात्परं प्रयागमिष्यतः इति प्रतीक्षते।

 उभयबन्धं प्रबलीकर्तुं यू एस् भारतं च। 

नवदिल्ली> भारत - अमेरिकयोः परस्परबन्धं प्रबलीकर्तुं युगपदुत्साहः भविष्यतीति भारतस्य विदेशकार्यमन्त्रालयेन निगदितम्। प्रधानमन्त्री नरेन्द्रमोदी नियुक्त यू एस् राष्ट्रपतिं डोनाल्ड ट्रम्पं दूरवाणीद्वारा कृते अभिनन्दनसम्भाषणे उभयराष्ट्रबन्धस्य शक्तीकरणे  दृढतां स्पष्टीकृतवन्तौ। 

  राष्ट्रसुरक्षा, साङ्केतिकविद्या, बहिराकाशमित्यादिमण्डलेषु परस्परसहयोगः प्रबलीकरिष्यति।

    तालिबानेन सह भारतस्य नयतन्त्रचर्चा सम्पन्ना।

नवदिल्ली> २०२१ तमे वर्षे अफ्गानस्य प्रशासनं स्वीकृतवता तालिबानेन सह इदंप्रथमतया भारतं नयतन्त्रचर्चामकरोत्। तालिबानस्य प्रवर्तमानः रक्षामन्त्री मुल्ला मुहम्मद याकूबः इत्यनेन सह भारतस्य नयतन्त्राधिकारिणः काबूले मेलनमकुर्वन्। 

  किन्तु तालिबानप्रशासनं अद्यावधि भारतेन नाङ्गीकृतम्। प्रत्युत, अफ्गानजनतां प्रति भारतस्य दीर्घकालीयबन्धमेव एतस्य मार्गदर्शकमिति विदेशकार्यवक्त्रा उक्तम्। 

राष्ट्रिय भीकरविरुद्धनयः शीघ्रमिति गृहमन्त्री। 

 नवदिल्ली> भीकरतां भीकराणाम् आवासव्यवस्थां च प्रतिरोद्धुं राष्ट्रिय भीकरविरुद्धनयः शीघ्रमेव प्रतिष्ठास्यतीति केन्द्रगृहमन्त्री अमित शाहः अवोचत्। दिल्ल्यां राज्यस्तरीयारक्षकाधिकारिणः समेत्य भागं गृहीते भीकरविरूद्धसम्मेलने भाषमाणः आसीत् अमित शाहः। 

  नीतिन्यायनिर्वहणं तत्तद्राज्यानां विषयोSपि आतङ्कवादस्य सीमा नास्तीति उक्तवान् गृहमन्त्री २०१४ तः आरभ्य  भीकरतां विरुद्ध्य मोदिप्रशासनस्य लाभानि प्रकीर्तितवान्। 

मुख्यन्यायाधिपः डि वै चन्द्रचूडः रविवासरे स्थानात् विरमति।

नवदिल्ली> सर्वोच्चन्यायालयस्य मुख्यन्यायाधिपस्य  डि वै चन्द्रचूडस्य अन्तिमः सेवादिवसः अद्य भवति। वर्षद्वयस्य मुख्यन्यायाधिपपदात् तेन  रविवासरे विरम्यते। आहत्य सार्धाष्टसंवत्सराणि सर्वोच्चन्यायालये न्यायाधिपरूपेण सेवां कृतवतः एतस्मात् अनेके स्वतन्त्र पुरोगमनमनपराः विधयः जाताः। तथा च सर्वोच्चन्यायालयस्य शासनक्षेत्रे नैकानि परिष्काराणि च तेन विधत्तानि।

बङ्लादेशे हैन्दवाः संरक्षणीयाः - भारतम्। 

        नवदिल्ली> बङ्लादेशस्थाय हिन्दुधर्मसमूहाय संरक्षणं दातव्यमिति भारतेन अभ्यर्थितम्। चिटगोङ् मण्डले हैन्दवानां प्रति विधत्ते आक्रमणे प्रतिषिध्य आसीत्  भारतस्य निवेदनम्। 

 जे डि वान्सः अमेरिकायाः उपराष्ट्रपतिः।

जे डि वान्सः पत्न्या उषया साकम्। 

 

वाषिङ्टणः> अमेरिकायाः राष्ट्रपतिपदं प्रति रिपब्लिकन् पार्टी इत्यस्य स्थानिशिनौ डोणाल्ड ट्रम्पे दृढे जाते ओहायो इत्यस्मात् चितः जेयिस्  डेविड्  वान्सः अमेरिकायाः उपराष्ट्रपतिः भविष्यति। विजयं दृढीकृत्य फ्लोरिडायां स्वानुयायिजनान् संबुध्य भाषमाणे आसीत् ट्रम्पस्य प्रस्तुतिः। २०१६ तमे निर्वाचनकाले ट्रम्पं 'हिट्लरं' उपमां कृतवानासीत् जे डि वान्सः। 

  जे डि वान्सस्य पत्नी उषा वान्सः भारतवंशजा अस्ति। आन्ध्रप्रदेशे पश्चिमगोदावरी जनपदात् अमेरिकाम् अधिनिवेशं कृतवत्योः  राधाकृष्ण-लक्ष्मी दम्पत्योः पुत्री भवति उषा।

भारत-नेपाल एन्वायर्मेंटल् लीडर्षिप् अवार्ड-2024 प्राचार्याय प्रो.एम्.सी.पाण्डे महोदयाय।

वार्ताहरः- डा. मूलचन्द्रशुक्लः।

   रामनगरम्> पी एन् जी राजकीय स्नातकोत्तर-महाविद्यालयस्य  प्राचार्यः प्रो.एम्.सी.पाण्डे महोदयः अस्मिन् संवत्सरस्य भारत-नेपाल एनवायरमेण्टल् लीडर्षिप् अवार्ड् इत्यनेन सम्मानितः।  एतस्मै अयं बिरुदः  नवम्बरमासस्य 11 दिनाङ्के नेपालस्थकाठमाण्डू नगरे नेपालस्य  विदेशमन्त्रिणा  प्रदास्यते। प्रो.पाण्डे महोदयेभ्यः पर्यावरणसंरक्षणाय वन्यजीवसंरक्षणाय च भारत- नेपालदेशयोः मैत्रीसम्मेलने आयोजकेन "ग्लोबल् लीडर्षिप् फोरम" इत्यनेन सम्माननमिदं प्रदास्यते।

   एतस्मात् पूर्वमपि पाण्डेय महोदयाः उत्तराखण्ड-सर्वकारस्य उच्चशिक्षायामुत्कृष्ट-उल्लेखनीयमवदानाय "भक्तदर्शन" पुरस्कारः, "प्रिंसिपल् ऑफ् द ईयर्", भारत सर्वकारस्य महात्मागान्धी राष्ट्रिय-ग्रामीण-शिक्षा परिषदः उच्च-शिक्षाविभागस्य "ग्रीन चैम्पियन्षिप् अवार्ड्, उत्तरप्रदेश राज्स्य "श्री के.एस.अय्यर् वाणिज्य गौरव सम्माननम्" इत्येतैः सम्मानैः पुरस्कृताः आसन्।

  अस्मिन्नवसरे महाविद्यालयस्य समस्त-प्राध्यापकाः शिक्षकेतरकार्मिकाश्च पाण्डे महोदयेभ्यो वर्धापनानि शुभकामनाश्च प्रेषितवन्तः।  

 निर्धनछात्राणाम् उपरिशिक्षायै 

पि एम् विद्यालक्ष्मी परियोजना समारब्धा। 

न्यासं विना दशलक्षपर्यन्तं शैक्षिकम् ऋणम्। 

नवदिल्ली> आर्थिकसङ्कटेन राष्ट्रस्य अग्रणीषु उन्नतशैक्षिकसंस्थासु अर्हतासु सत्स्वपि ये प्रवेशः अलभमानाः वर्तन्ते तादृशानां निर्धन-मध्यस्तरीयछात्राणां  कृते केन्द्रप्रशासनस्य सविशेषा ऋणसमायोजना समारब्धा। 'पि एम् विद्यालक्ष्मी' इति कृतनामधेयया अनया परियोजनया दशलक्षं रूप्यकाणि यावत् ३% स्वल्पधनवृद्ध्या  लप्स्यन्ते। 

  राष्ट्रियसंस्थाश्रेणीकरणमाधारीकृत्य प्रथमशततमश्रेण्याम् अन्तर्भूतासु केन्द्रीयशैक्षिकसंस्थासु प्रथमद्विशतश्रेण्यां वर्तमानासु राज्यस्तरीय-केन्द्रप्रशासनसंस्थासु च येषां प्रवेशः लभ्यते तेषां अल्पधनवृद्ध्या निक्षेपं विना च शैक्षिकऋणाय अर्हता अस्ति।

अमेरिकाराष्ट्रस्य  ४७ तमं राष्ट्रपतिपदं डोनाल्ड् ट्रम्पः प्राप्तवान्।

   डेमोक्रेटिक्-पक्षीयप्रतिनिधिं कमला-हैरिसं पराजित्य डोनाल्ड् ट्रम्पः २७७ 'इलेक्टोरल्-वोट्' प्राप्त्वा अमेरिकायाः ४७ तमः राष्ट्रपतिः अभवत्। कमला हैरिसः  २२६ इलेक्टोरल्-वोट् प्राप्तवती। सेनेट्-सभायां रिपब्लिक्-पक्षाय बहुमतं प्राप्तम्। जेडी वांस् उपराष्ट्रपतिः भविष्यति।

    ७८ वर्षीयः डोनाल्ड् ट्रम्पः पुनरपि राष्ट्रपतिस्थानं प्राप्य विशेषम् इतिहासं निर्मितवान्। अमेरिकायाः इतिहासे पराजयानन्तरं पुनः निर्वाचितः द्वितीयः राष्ट्रपतिः एव अभवत् एषः। इतः पूर्वं ग्रोवर् क्लिवलान्डः अपि एवं निर्वाचितः आसीत्।

 वार्तामुक्तकानि। 

इस्रयेलस्य गासाक्रमणमनुवर्तते - ३० मरणानि। 

डेयर् अल्बला> उत्तरगासायां सोमवासरे रात्रौ  इस्रयेलेन कृते आक्रमणे ३० जनाः हताः। मृतेषु अष्ट महिलाः षट् बालकाश्च। मासैकं यावत् गासायाम् इस्रयेलेन शक्तः सैनिकप्रक्रमः अनुवर्तते। 

यू एस् प्रतिनिधिसभां प्राप्तुं नव भारतवंशजाः। 

वाषिङ्टणः> यू एस् जनप्रतिनिधिसभां प्रति सम्पन्ने निर्वाचने नव भारतवंशजाः स्पर्धितवन्तः। वेर्जिनिया, कैलिफोर्निया, वाषिङ्टणः, इलिनोय्, मिषिगण् , अरिसोणा, कन्सासः, न्यूजेर्सी इत्येतेभ्यः राज्येभ्यः एव एते स्पर्धन्ते। एषु त्रयः नूतनमुखाः सन्ति। 

नेय्मरः पुनरपि आहतः। 

रियादः> आहतात् विमुच्य क्रीडाङ्कणं प्रत्यागत्य स्पर्धाद्वये क्रीडिते ब्रसीलस्य नेय्मरः पुनरपि आहतः अभवत्। एष्यन् चाम्प्यन्स् लीग् स्पर्धानामन्तरे सौद्याः अल् हिलालक्रीडकः व्रणितोSभवत्। आगामी स्पर्धाद्वयात् सः निवारितः अस्ति।

 संसदः शीतकालसम्मेलनं २५ तमे दिनाङ्के आरप्स्यते। 

नवदिल्ली> महाराष्ट्रं झार्खण्डविधानसभानिर्वानात् परं नवम्बर् २५ तम दिनाङ्कतः भारतीयसंसदः शीतकालसम्मेलनमारब्धुं निश्चिकाय। डिसम्बर् २० तमे समाप्यते। 

  'एकराष्ट्रम् एकनिर्वाचनं' , वखफनियमपरिष्करणम् इत्यादीनि विधेयकानि प्रचाल्यमानसम्मेलने अवतरिष्यन्ति। 

  सम्मेलनस्य द्वितीयं दिनं - नवंबर २६- प्रशासन नीतिसंहितादिनत्वेन आचरिष्यति। पुरातनसंसद् मन्दिरस्य केन्द्रसभागारे लोकसभा-राज्यसभयोः संयुक्तसम्मेलनं समायोज्य एव नीतिसंहितायाः ७५ तमं वार्षिकम् आचरिष्यतीति संसदीयमन्त्रिणा किरण रिजिजुवर्येण निगदितम्।

 २०३६ ओलिम्पिक्स् - आतिथ्याय भारतेन अर्थितम्। 

नवदिल्ली> २०३६ तमवर्षस्य ओलिम्पिक्स् महोत्सवाय आतिथ्यं वोढुं सन्नद्धतां विज्ञाप्य अन्ताराष्ट्र ओलिम्पिक्स् समित्याः पुरतः   भारतस्य  ओलिम्पिक्स् समित्या [ऐ ओ ए] निवेदनं समर्पितम्। आतिथेयत्वे तात्पर्यं प्राकट्य प्रधानमन्त्रिणा केन्द्रकायिकमन्त्रालयेन च प्रस्तुतमपि औद्योगिकरीत्या सर्वकारेण कृतः प्रथमः पदक्षेपो भवतीदं निवेदनम्। 

  ओक्टोबर् मासे ऐ ओ सि संस्थायाः Future Host Commission इत्यायोगं प्रति निवेदनपत्रं प्रेषितमासीत्। भारतेन सह सौदी अरेब्या, खत्तरः, तुर्की इत्यादिराष्ट्राण्यपि आतिथ्याय उत्साहं प्रकटयन्ति। यदि भारतम् आतिथ्यराष्ट्रं भविष्यति तर्हि अलहबादं केन्द्रीकृत्य स्पर्धाः आयोजयिष्यतीति सूच्यते।

 कानडायां हैन्दवमन्दिरं प्रति खालिस्थानवादिनाम् आक्रमणम्। 

कानडप्रशासनं विरुद्ध्य भारतस्य तीव्रः प्रतिषेधः। 

नवदिल्ली> कानडाराष्ट्रे ब्रांस्टण् इत्यत्र हिन्दुसभायाः मन्दिरं प्रति खालिस्थानवादिनाम् आक्रमणं जातम्। खालिस्थानपताकाः धारयन्तः प्रक्षोभकारिणः मन्दिरं प्राप्तवतः  जनान् दण्डानुपयुज्य ताडनं कृतस्य दृश्यानि बहिरागतानि। भारतनयतन्त्रकार्यालयेन मन्दिरे आयोज्यमानः कार्यक्रमः स्थगितः आसीत्। 

    भारतस्य प्रधानमन्त्री नरेन्द्रमोदी अक्रमममुम् 'एक्स्' द्वारा  कठिनस्वरेण व्यमर्शयत्। भारतस्य निश्चयदार्ढ्यं दुर्बलीकर्तुं क्रियमाणाः एतादृशघटनाः विफलीकरिष्यन्ते इति तेन निगदितम्।