कोविड्१९ - भारते ८४% रोगिषु रोगाणुसान्निध्यं न्यूनानुपाते इति  अध्ययनावलोकनम्।
     नवदहली >भारते कोविड्१९ रोगव्यापने कोरोणरोगाणोः रोगिषु सान्निध्यं राष्ट्रान्तराण्यपेक्षया न्यूनमेवेति  अध्ययनावलोकनम्। भारते ८४% रोगिषु अपि रोगाणोः सान्निध्यं आशङ्काजनकं न भवति, अनेन रोगव्यापनसाध्यतापि विरलेति अवलोकनं सूचयति। एतेभ्यः रोगिभ्यः ०.८% एव रोगव्यापनं स्यात्। तथापि, ७% रोगिषु रोगाणोः सान्निध्यं उन्नतानुपाते वर्तते। एतत्तु ६.२५% इत्यनुपाते रोगव्यापनाय कारणं भवति इति ऐ सि एम् आर् संस्थायाः नेतृत्वे कृतं  अध्ययनं सूचयति।

स्वयंपर्याप्तमार्गैः भारतस्य आर्थिकीं व्यवस्थां शक्तं कुर्वन्तु - प्रधानमन्त्री नरेन्द्रमोदी।

     नवदहली> कोविड् प्रतिरोधप्रवर्तनेषु भारतस्य विपुला जनसंख्या क्लेशजनिका एव इति प्रधानमन्त्री नरेन्द्रमोदी। अत्याधुनिकस्वास्थ्यसंविधानानि सन्ति चेदपि १३०कोटि इति जनसंख्या कुत्रचित् प्रतिरोधप्रवर्तनानि प्रतिकूलतया बाधते, तथापि विश्वस्य अतिसम्पन्नराष्ट्राणाम् अधुनातनावस्थया सह तुलनेन भारतीयानाम् एकता सामर्थ्यं च उत्तमम् इत्येतत् अभिनन्दनमर्हति - केन्द्रसर्वकारस्य वार्षिकदिने जनान् प्रति सज्जीकृते लेखने प्रधानमन्त्री असूचयत्। सर्वे भारतीयाः कोविड्प्रतिरोधप्रवर्तनेषु आत्मविश्वासेन दृढनिश्चयेन च भागभागिनः अभवन्। प्रतिकूलेऽस्मिन् समये बहुभ्यः जनेभ्यः कष्टताः समस्याः च अभवन्, तासां परिहाराय सर्वकारः प्रतिज्ञाबद्‌धः अस्ति, सर्वेषाम् ऐक्यं पुरस्कृत्य ताः परिह्रियन्ते - नरेन्द्रमोदिनः लेखनं सूचयति। वाणिज्यव्यापारमण्डलसहितेषु सर्वत्र स्वयंपर्याप्तप्रवर्तनैः सह राष्ट्रस्य सम्पद्व्यवस्थायाः पुनरुज्जीवनं केन्द्रसर्वकारस्य मुख्यं लक्ष्यं भवति, तदर्थम् आवश्यकाः निर्देशाः २०लक्षं कोटिरुप्यकाणाम् आत्मनिर्भरभारताभियानपरियोजनया दत्ताः सन्ति, एकैकस्यापि भारतीयस्य कृते अवसराणां नवयुगं स्रष्टुं परियोजनेयम् उपकरिष्यति, तेषां प्रयोजनं राष्ट्रस्य अधःस्थितजनविभागतः सर्वेभ्यः लभ्यते - प्रधानमन्त्री लेखनेन सूचयति।

त्रयः भीकराः भारतबलेन निहताः। 

श्रीनगरं >  दक्षिणकाश्मीरस्य पुल्वामप्रदेशे 'जय्षे मुहम्मद'नामिकायाः आतङ्कवादसंस्थायाः बोम्बनिर्माणविदग्धः अभिव्याप्य त्रयः भीकराः भारतबलेन व्यापादिताः। 'ऐ ई डि' विदग्धः फौजि भायीति कुप्रसिद्धः अब्दुल् रह्मान् नामकः तदितरौ च सैन्यारक्षकरक्षासेनानां संयुतप्रक्रमेण निहताः। अन्यौ द्वौ न प्रत्यभिज्ञातौ। पुल्वामप्रदेशस्य 'कङ्कण'मण्डले बुधवासरे प्रभाते आसीत् प्रतिद्वन्द्वः संवृत्तः। 

  फौजि भायीत्यस्य यथार्थनाम  'इक्रमः' , सः जय्षे मुहम्मदस्य वरिष्ठनेता अब्दुल् रौफ् अस्गर् इत्यस्य विश्वस्तः इति आरक्षकप्रमुखेण विजयकुमारेणोक्तम्। मेय् २८ दिनाङ्के पुल्वामे ४८ किलोपरिमितस्फोटकवस्तुपूर्णे कार् याने निगृहीते , एषः रक्षां प्राप्तः इति तेन निगदितम्। 

  फौजीनामकस्य वधः सैन्याय महाल्लाभ इति मन्यते।

आशङ्कां संवर्ध्य कोविड्१९- विश्वे कोविड्१९ रोगिणां संख्या वर्धते।

       वाषिङ्टण् > आशङ्कां संवर्ध्य विश्वे कोविड्१९ रोगिणां संख्या अनुदिनं वर्धमाना एव। नूतनावलोकनमनुसृत्य रोगिणां संख्या ६५.५ लक्षम् अतीता च। एतावता विश्वे कोविड्१९ रोगेण ३८७.८७८ जनाः मृताः ३,१६४,२५३ जनाः रोगमुक्तिं प्राप्ताः च वर्तन्ते। अमेरिकदेशे स्थितिः गुरुतरा इव अनुवर्तते। ब्रसील्-रष्यदेशयोः अवस्थापि भिन्ना न। तथापि,प्रथमं रोगव्यापनम् अधिकतया दृष्टानां स्पेयिन्,इटलि,युके इत्यादिषु कोविड्व्यापनं नियन्त्रणात्मकं वर्तते इत्येतत् आश्वासदायकं वर्तते।

मण्सूण् वर्षाकालः केरलं समागतः ; 'निसर्ग' चक्रवातः अद्य प्राप्नोति। 

 अनन्तपुरी >  दक्षिणपश्चिमीयः वर्षाकालः [मण्सूण् वृष्टिः] जूण् प्रथमे दिने एव केरलं संप्राप्तः। परं सेप्टम्बर् मासपर्यन्तं केरले वृष्टिकालः। अस्मिन्नवसरे अपि भारतस्य दक्षिणप्रान्तेषु सामान्यतया महती वृष्टिः लप्स्यत इति पर्यावरणविभागेन निगदितम्। 

   गतदिने लक्षद्वीपसमीपे रूपीकृतः न्यूनमर्दः गोवातीरे शक्तो$भवत्। अद्य सः महान् चक्रवातः भविष्यति । तस्य निसर्ग इति नामापि कृतम्। चक्रवातः महाराष्ट्रस्य उत्तरं तथा गुजरात्तस्य दक्षिणं तीरं प्राप्स्यति। बुधवासरे सायं महाराष्ट्रस्य रायिगडे हरिहरेश्वर-दामनोः मध्ये अयं भूस्थलं प्राप्स्यतीति केन्द्रपर्यावरणविभागेन उक्तम्।

केरलीयविद्यालयेषु अद्य विद्यारम्भः - 'ओण् लैन्' द्वारा! 

विक्टेर्स् नालिकाद्वारा अद्य आरब्धः +२ कक्ष्यायाः आङ्लविषयवर्गः!

अनन्तपुरी > केरलीयविद्यालयछात्राणामद्य नूतन साक्षिकसंवत्सरस्य प्रारम्भः। प्रथमकक्ष्यातः आरभ्य दशमीकक्ष्यापर्यन्ताः छात्राः तथा +२ छात्राश्च स्वगृहेषु एव तिष्ठन्तः अध्ययनदिनानां प्रारम्भः कुर्वन्ति। 'कैट् विक्टेर्स्' संप्रेषणनालीद्वारा 'First Bell' नामकाः ओण् लैन् वर्गाः प्रचलन्ति। प्रतिविषयं अर्धहोरायुतवर्गाः एव सन्ति। प्रभाते ८.३० वादनतः ५.३० वादनपर्यन्तमेव वर्गाः प्रचलिष्यन्ते। प्रथमवर्गः +२ छात्राणां कृते आङ्गलविषये भविष्यति! 

  दूरदर्शनं, आन्ड्रोय्ड् दूरवाणी, सङ्गणकयन्त्रम् इत्यादिभिः कक्ष्याः अनुगन्तुं शक्नुवन्ति। www.victers.kite.Kerala.gov.in इति अन्तर्जालद्वारा , facebook.com/Victerssduchannel इति फेस् बुक् द्वारा अपि तत्समयसम्प्रेषणं द्रष्टुं शक्यते। संप्रेषणानन्तरं youtube.com/itsvicters इति यूट्यूब् नालिकाद्वारा अपि द्रष्टुं शक्यते। प्रथमसप्ताहे वर्गाः परीक्षणरूपेणैव स्वीक्रियन्ते। अगामिसोमवासरे यथाक्रमं पुनःसंप्रेषणमपि भविष्यति। 

भारते सम्पूर्णपिधानं सोपानबद्धतया निराक्रियते। 

राष्ट्रस्य उद्घाटनाय सोपानत्रयं विहितम्! उद्घाटनं १ जूण् ८ दिनाङ्कतः!

 नवदिल्ली >  ६७ दिनानां पिधानस्यानन्तरं राष्ट्रोद्घाटनाय भारतम्। जूण् प्रथमे दिने आरभ्यमाणे पिधानस्य पञ्चमसोपाने केवलं तीव्रमण्डलेष्व कर्कशनियन्त्रणानि विधास्यन्ति। अन्यमण्डलप्रदेशेषु सोपानबद्धतया साधारणप्रवर्तनानि अनुमोदितुं केन्द्रशासनेन 'अण्लोक् -१'नामकाः मार्गनिर्देशाः उद्घुष्टाः। 

  मुख्याः निर्देशाः - 

* अपिधानं - १ काले$पि मुखावरणधारणं, सामाजिकदूरपालनम् इत्यादीनि अवश्यानि!

* विवाहः,मरणानन्तरक्रिया इत्यादीनां सामान्यकार्यक्रमाणां नियन्त्रणमनुवर्तिष्यते!

* तीव्रमण्डलेभ्यः बहिः कानि कानि नियन्त्रणानि  आवश्यकानीति तत्तद्राज्यसर्वकारैः निर्णेतुं शक्यते! 

* जूण् ८तः आराधनालयाः विपणिकलापाः, भोजनालयाश्च उद्घाटनीयाः! 

 'अपिधानं २' सोपाने  विद्यालयानामुद्घाटनविषये राज्यसर्वकारैः सह चर्चां कृत्वा अन्तिमनिर्णयः कार्यः! अपिधानस्य तृतीयसोपाने चलच्चित्रशालाः ,उद्यानानि , इत्यादीनां सामान्यजनसम्पर्कमण्लानां विषयेषु निर्णयः भविष्यति!

राष्ट्रस्य कोविड्प्रतिरोधः एकमनसा एव - अमितशाहः। 

               नवदहली > कोविड्प्रतिरोधप्रवर्तनेषु राष्ट्रम् एकमनसा एव अग्रेसरत् वर्तते इति केन्द्रगृहमन्त्री अमितशाहः। ऐक्यस्यास्य संरक्षणेन कोविड्युद्धे विजयः सुनिश्चित एव इति सः अवदत्। आनुकूल्यसहितेन पञ्चमवारपिधानेन राष्ट्रं पूर्वस्थितिं प्राप्स्यति इत्यपि सः अभिप्रयत्। राज्यान्तरीयकर्मकराणां जीवनसमस्यासु केन्द्रसर्वकारस्य श्रद्धा अवश्यं वर्तते, कोविड्प्रतिरोधप्रवर्तनेषु राज्यैः सह पर्यालोच्य एव केन्द्रसर्वकारेण निर्णया: स्वीक्रियन्ते प्रख्याप्यन्ते च - अमितशाहः असूचयत्।

कायिकम् - भारतस्य प्रथमा विदेश 'डे नैट् टेस्ट्' स्पर्धा डिसम्बरमासे।

       सिड्नी> भारतस्य प्रथमा विदेश डे नैट् टेस्ट् स्पर्धा डिसम्बरमासे ओस्ट्रेलियमध्ये प्रचलिष्यति। एतत्सम्बन्ध्य समयसारिणी क्रिकेट् ओस्ट्रेलियसंस्थया प्रख्यापिता वर्तते। अस्यां श्रेण्यां चतस्रः स्पर्धाः वर्तन्ते। प्रथमा स्पर्धा डिसम्बरमासस्य ११ दिनाङ्कतः १५ दिनाङ्कपर्यन्तम् अड्लेय्ड्मैताने प्रचलिष्यति। समयसारिणी प्रख्यापिता चेदपि कोविड्१९ रोगस्य तदानीन्तनावस्थां निरीक्ष्य एव क्रिकेट्स्पर्धानां सञ्चालनं भविष्यति इत्यपि क्रिकेट् ओस्ट्रेलियसंस्थया प्रस्तावितम्।

एम् पि वीरेन्द्रकुमारः दिवंगतः। 

राज्यसभासदस्यः, भूतपूर्वः केन्द्रमन्त्री, 'मातृभूमी' दिनपत्रिकायाः अध्यक्षः, प्रमुखः साहित्यकारः , .....कर्मनिरतः जनकीयनेता। 

अन्त्यः ह्यः रात्रौ ११.३०, अन्त्यकर्माणि अद्य सायं पञ्चवादने वयनाटस्थे स्वगृहे।

कोष़िक्कोट् >  साहित्यकारः, प्रभाषकः, कर्मनिरतः सामाजिकः, प्रमुखः 'सोष्यलिस्ट्'नेता , भूतपूर्वः केन्द्रमन्त्री, पत्रकारितामण्डलेषु कृहस्तः नेता .... इत्यादिभिः बहुभिर्विशेषणैः अलङ्क्रियमाणः एम् पि वीरेन्द्रकुमारः दिवंगतः। ह्यः रात्रौ ११.३०वादने कोषिक्कोटस्थे कस्मिंश्चित् निजीयातुरालये हृदयाघातेन आसीत् तस्य परलोकप्राप्तिः। अन्त्यकर्माणि अद्य सायं ५ वादने वयनाटस्थे पुलियार्मलनामके जन्मग्रामे स्वगृहे सम्पत्स्यति। 

  जनतादलमिति राजनैतिकदलस्य अध्यक्षपदं बहुकालमलङ्कृवान् वीरेन्द्रकुमारः केन्द्रमन्त्रिसभायां वित्तमन्त्रालये वृत्तिमन्त्रालये च सहमन्त्रिरूपेण बहुकालं कार्यं कृतवान्।  इदानीं केरलतः राज्यसभासदस्यः भवति। 

  साहित्यमण्डले च सः स्वकीयां व्यक्तिमुद्रामालेखितवान्। सांस्कृतिक- दार्शनिकविषयेषु असंख्यानां प्रौढानां कृतीनां कर्ता भवति वीरेन्द्रकुमारः। केन्द्र-केरलसाहित्याक्कादमीपुरस्काराः , ओडक्कुष़ल् पुरस्कारः, वयलार् पुरस्कारः इत्यािभिः बहुभिः पुरस्कारैः सम्मानितः। 

  पत्रकारमण्डले अपि तस्य स्थानम् अद्वितीयमासीत्। 'मातृभूमि' इति कैरलीपत्रिकायाः चेयर्मान्, मानेजिङ् एडिट्टर् च अस्ति। प्रस् ट्रस्ट् आफ् इन्डिया इत्यस्य उपाध्यक्षः, कोमण् वेल्त् प्रस् यूणियन् अङ्गः, इन्डियन् न्यूस् पेपर् सोसैटि इत्यस्य निर्वाहकसमित्यङ्गः एतादृशानि बहूनि पदानि तेन अलंकृतानि।