'सुसुकी' संस्थायै भारतस्य आदरसमर्पणं - ओसामु सुसुकीवर्याय पद्मविभूषणम्। 
ओसामु वर्यः मारुति ८०० यानं च।
नवदिल्ली> भारते सामान्यजनानां कार् यानाभिलाषसफलतायै प्रयत्नं कृतवान् 'सुसुकि मोटोर्स् कोर्परेषन्' इत्यस्य अध्यक्षाय ओसामु सुसुकीवर्याय पद्मविभूषणपुरस्कारं मरणानन्तरबहुमतिरूपेण दत्वा राष्ट्रस्य कृतज्ञताप्रकाशनम्। 'मारुति ८००' इति लघु कार् यानं अवतार्य राष्ट्रे लक्षशः सामान्यजनानाम् अभिलाषः तेन सफलीकृतः।
१९८२ तमे वर्षे सुसुकीमोटोर्स् भारतस्य वाहननिर्माणसंस्था मारुती इत्यनया सह सम्बन्धेन अवतारितं 'मारुति ८००' इति लघु कार् यानं विपणिं विजितवत्। ओसामुवर्यः आसीत् तदा सुसुक्याः अध्यक्षः। तत्तु भारतस्य यात्रायानमण्डले चरितं व्यरचयत्। २०२४ डिसम्बर् २४ तमे दिनाङ्के ओसामुवर्यः जापाने दिवंगतः। भारतस्य आदराञ्जलिरूपेण अस्य वर्षस्य पद्मविभूषणपुरस्कारः तस्मै दत्तः च।