केरले उत्तरजनपदेषु अतिवृष्टेः सम्भावना।
अद्य चतुर्णां शैक्षिकसंस्थानां विरामः।
अनन्तपुरी> फैन्जल् चक्रवातः न्यूनमर्दरूपं प्राप्य उत्तरकेरलस्य कर्णाटकस्य च उपरिभागेन आरबसमुद्रं लक्ष्यीकृत्य सञ्चरतीत्यतः उत्तरकेरलजनपदेषु कर्णाटके च अतितीव्रवृष्टिः प्रोक्ता पर्यावरणविभागेन।
कण्णूर् कासरगोड् जनपदयोः ओरन्जजागरूकता, मलप्पुरं वयनाट् कोष़िक्कोट् जनपदेषु पीतजागरूकता च प्रख्यापिता।
तृश्शुर् कासरगोड् मलप्पुरं जनपदस्थानां शैक्षिकसंस्थानां कुजवासरे विरामः प्रख्यापितः। परन्तु पूर्वनिश्चितानां परीक्षाणाम् अभिमुखानां च विरामः न बाधते।