स्पेयिने आकस्मिकप्रलयः - ७२ मरणानि।
बार्सिलोना> स्पेयिनराष्ट्रस्य दक्षिणपूर्वमण्डले कुजवासरे जातया अतिवृष्ट्या सञ्जाते आकस्मिकप्रलये ७२ जनाः मृत्युमुपगताः। अनेके जनाः अप्रत्यक्षाः अभवन्।
मलागतः आरभ्य वलन्सियपर्यन्तं वर्तमानेषु प्रदेशेषु एव प्रलयदुष्प्रभावः अतितीव्रः अनुभूतः। ८ होराभ्यन्तरे ४९१ मिल्लीमीटर् मिता वर्षा वलन्सियायां चिवानगरे अङ्किता। १९९६ तमस्यानन्तरं प्रथमतया एव एतादृशप्रलयदुष्प्रभावः तीव्रतया अनुभूयते।
उपसहस्रं सैनिकाः रक्षाप्रवर्तनाय विन्यस्ताः। मृतानाम् आदरसूचकत्वेन दिनत्रयस्य दुःखाचरणं प्रख्यापितम्।