सहस्रकोटिरूप्यकाणां मादकगुडिकाः निगृहीताः। 

'ओपरेषन् वज्र' दौत्यस्य अंशः। 

सी बी एन् संघेन निगृहीताः उन्मादकगुडिकाभाण्डाः।

दिल्ली> विदेशराष्ट्रं नेतुं प्रयततमानाः सहस्रकोट्यधिकरूप्यकाणाम् उन्मादकगुडिकाः - नाम्ना ट्रामडोल् tramadole - दिल्ल्यां सी बी एन् संस्थया [Central Bureau of Narcotics] निगृहीताः। प्रकरणेSस्मिन् द्वौ केरलीयौ अपि निगृहीतौ। प्रकरणस्यास्य सूत्रधारः यः बङ्गलुरु नगरस्थायाः गुडिकोत्पादनसंस्थायाः निदेशकः पूर्वमेव निगृहीतः। 

  दिल्ल्यां कस्मिंश्चित् भवने परिपालिताः ३०,००० किलोमिताः गुडिकाभाण्डाः एव सी बी एन्  संघेन निगृहीताः।  केन्द्र वित्तमन्त्रालयस्य अधीशत्वे वर्तमानेन सी बी एन्  विभागेन क्रियमाणस्य 'ओपरेषन् वज्र' इति दौत्यस्य अंशतया आसीत् इदं बृहत्  उन्मादकलवनं सम्पन्नम्।

 युक्रैने पण्यमहानौकां प्रति रष्यायाः आक्रमणम्। 

१० नाविकाः मृताः। ४ भारतीयाः।

ओडेसा> युक्रैने ओडेसानौकाश्रये पण्यमहानौकां विरुध्य रष्यया कृते व्योमाक्रमणे दश नाविकाः मृताः। मृतेषु चत्वारः भारतीयाः भवन्ति। तेषु एकः केरलीयः अस्ति।  कासरगोड् प्रदेशीयः अखिल् जोयन् [२६] इति प्रत्यभिज्ञातम्। 

  गिनि-बसावु राष्ट्रस्य ध्वजं वहन्तीं 'गोल्डण् लियो' नामिकां पण्यमहानौकां प्रति आसीत् मिसैलशस्त्राक्रमणम्। रविवासरे रात्रौ आसीदाक्रमणम्।

 जम्मु-काश्मीरे आकस्मिकप्रलयः - अष्ट मरणानि। 

आकस्मिकप्रलयेन आपन्नः विनाशः। 

जम्मु> जम्मु-काश्मीरस्य पूञ्च्, रजौरी इत्येतयोः प्रदेशयोः गतदिने अतिवृष्ट्या दुरापन्ने आकस्मिकप्रलये ८ जनाः मृताः। षट् जनाः तिरोभूताः। बहुत्र वीथयः विनश्य सञ्चारसुविधाः विनष्टाः। 

  पूञ्च् प्रदेशस्थे सुरन्कोट् टह्सिल्  इत्यत्र प्रलयेन महानाशः आपन्नः। भूविच्छेदे गृहं विशीर्य प्रवाहितम्।  गृहे सत्सु अष्टसु द्वयोः मृतशरीरे अधिगते। शतशः जनाः सुरक्षितस्थानं नीताः। 

  दर्हाली, खण्ड ली, सुक्तोह्, जमोला इत्येताः नद्यः आप्लुतोदकाः अभवन्। अमर्नाथ-वैष्णोदेवी-शिवखोरी मन्दिराणि प्रति तीर्थयात्रा अल्पकालिकया स्थगिता।

 गासायाम् इस्रयेलस्य आक्रमणम्।

बालकानभिव्याप्य ११ जनाः हताः। 

गासानगरं> गासाप्रदेशस्य विविधस्थानेषु वाससमुच्चयं प्रति इस्रयेलेन कृते व्योमाक्रमणे ११ जनाः हताः। एकस्मिन् परिवारे त्रीणि अपत्यानि अभिव्याप्य पञ्च जनाः मृताः। आक्रमणसमये बहिः वृत्तः एकः बाल एव तस्मिन् परिवारे अवशिष्यते। 

  गासा नगरे अन्यत्र कृते आक्रमणे त्रयः मृताः। विविधस्थानेषु अभयार्थिशिबिराणि, वाससमुच्चयं प्रति च आक्रमणं विधत्तम्। हमाससैनिकान् विरुध्य आसन् आक्रमणानीति इस्रयेलस्य विशदीकरणम्। 

  २०२५ ओक्टोबरमासे गासायां युद्धविरामः प्रबलो जातः अपि युद्धविरामलङ्घनम् आरोप्य मुहुर्मुहुः इस्रयेलः आक्रमणं विधास्यति। एतादृशाक्रमणेषु अद्यावधि ११४४ जनाः मृत्युमुपगताः। इस्रयेलस्य पञ्च सैनिकाः अपि विनष्टप्राणाः अभवन्।

 स्पेयिनः  विश्वविजेता।

अर्जेटीना निपतिता [१-०]

विश्वचषकेन सह स्पेयिनक्रीडकाः।

न्ययोर्क्> अत्यन्तम् आकाङ्क्षाभरिते अन्तिमप्रतिद्वन्द्वे वर्तमानीनवीरं  अर्जेन्टीनादलं १ - ० क्रमेण  पराजित्य स्पेयिनः २३तमं विश्वचषकं स्वायत्तीचकार। अधिकसमये १०६ तमे निमिषे आसीत् स्पेयिनस्य विजयनिर्णायकं लक्ष्यकन्दुकम्। 

  प्रथमार्धः लक्ष्यकन्दुकरहितेन परिसमाप्तः। भूरिसमये कन्दुकस्योपरि पादाधिपत्यं स्पेयिनस्य आसीत्। चतुष्पञ्चवारं अर्जेंटीनायाः लक्ष्यजालं लक्ष्यीकृत्य कन्दुकप्रहाराः स्पेयिनस्य पक्षतः अजायन्त। अर्जेंटीनापक्षतः तादृशप्रयत्नाः न दृष्टाः। ३८ तमे निमिषे कुवृत्तिकारणेन पीतपत्रदण्डं विहितः अर्जेंटीनाक्रीडकः एल् मार्टिनेसः अर्धान्त्ये प्रतिनिवृत्तः। तत्स्थाने निकोलो कोटमेन्डी प्रविष्टश्च। 

  द्वितीयार्धः अर्जेंटीनायाः आक्रमणेन आरब्धः अपि  स्पेयिनः लेशमपि वशीभूतो नाभवत्। क्रमेण क्रीडायाः नियन्त्रणं स्पेयिनेन वशीचकार। अनुस्यूततया द्वित्राणि आक्रमणानि अर्जेंटीनायाः लक्ष्यजालमुखे कृतानि च। किन्तु लक्ष्यरक्षकस्य वैभवात् लक्ष्यकन्दुकं दूरं स्थितम्। 

  ९०+३ तमे निमिषे अर्जेंटीनायाः एन्सो फेर्णान्टसः द्वितीयवारं पीतपत्रं स्वीकृत्य बहिर्गतवान्। निर्धारितसमयः लक्ष्यरहितः सन् समाप्तः। 

  अधिकसमये कृते जीवन्मरणसंग्रामे १०६ तमे निमिषे अर्जेन्टीनायाः  मेसेः च हृदयभेदकं लक्ष्यकन्दुकं स्पेयिनस्य टोरिस् नामकस्य पादात् जातम्। ततः मेसीसंघः सर्वशक्तिं संगृह्य प्रत्याक्रमणम् अकरोदपि सर्वः प्रयत्नः निष्फलः जातः। अथ २०१० विश्वचषकस्य अनन्तरं पुनरपि स्पेयिनः विश्वकिरीटं चुचुम्ब।

 राष्ट्रिय चलच्चित्रपुरस्काराः उद्घोषिताः। 

मम्मूट्टिः कार्तिक् आर्यः च श्रेष्ठौ नटौ। 

'आर्टिकिल् ३७०' श्रेष्ठं चित्रं, राज्कुमार् पेरिय सामी निदेशकश्रेष्ठः।

राष्ट्रियचलच्चित्रपुरस्कारजेतारः मम्मूट्टिः, कार्तिक् आर्यन्, यामी गौतं च। 

नवदिल्ली> २०२४ वर्षस्य राष्ट्रिय चलच्चित्रपुरस्काराः उद्घोषिताः। मलयालस्य महानटः मम्मूट्टिः बोलिवुड् अभिनेता कार्तिक् आर्यः च श्रेष्ठाभिनेतृपुरस्काराय चितौ। राहुल सदाशिवेन निदेशकत्वं कृते भ्रमयुगम् इति कैरलीचित्रे अभिनयः मम्मूट्टिवर्याय पुरस्कारार्हः अभवत्। चतुर्थवारमेव अस्मै अयं रजतकमलपुरस्कारः। ' 'चन्दु चाम्प्यन्' इति चित्रस्य अभिनयेन कार्तिक् आर्यः श्रेष्ठनटः अभवत्। 

  श्रेष्ठचित्राय दीयमानः सुवर्णकमलपुरस्कारः आदित्य सुहास् जम्भाले इत्यनेन  निदेशं कृताय  'आर्टिकिल् ३७०' इति चित्राय उपलब्धः। अस्य चलच्चित्रस्य अभिनयेन यामी गौतं श्रेष्ठा अभिनेत्री जाता। 

  ए आर् एम् इति चित्रे प्रदर्शितेन आलापनवैशिष्ट्येन कैरलीगायिका वैक्कं विजयलक्ष्मी सर्वोत्तमा गायिका अभवत्। तमिल चलच्चित्रम् 'अमरन्' इत्यस्य निदेशकः राज्कुमार् पेरिय सामी निदेशकश्रेष्ठः जातः।

 विनष्टान्तिमयोः स्पर्धा। 

फ्रान्सं ६ - ४ लक्ष्यक्रमे निष्प्रभं कृत्वा इङ्गलाण्टस्य तृतीयस्थानम्।

एम्बापे मेसिम् अतिक्रम्य लक्ष्यसम्पादने विश्वकीर्तिमवाप।

मियामी> गतरात्रौ सम्पन्ने विनष्टान्तिमयोः प्रतिद्वन्द्वे इङ्गलाण्टदलः फ्रान्सदलं ६ - ४ इति लक्ष्यक्रमे प्रभञ्ज्य तृतीयस्थानम् अवाप। क्रीडायाः  प्रथमार्धे फ्रान्सं निष्प्रभं कृत्वा इङ्गलाण्टः प्रत्युत्तरविहीनैः चतुर्भिः लक्ष्यैः अग्रे आसीत्। किन्तु द्वितीयार्धे फ्रान्सेन शौर्यं प्रकटितमपि विजयनिग्रहणे असमर्थो जातः। इङ्गलाण्टस्य साकावर्यस्य लक्ष्यत्रयं फ्रान्सस्य एम्बापेवर्यस्य लक्ष्यद्वयं च सविशेषप्रस्तावमर्हति।

  तथा च किलियन् एम् बापे वर्यस्य लक्ष्यद्वयसम्पादनेन अस्मिन् विश्वचषके आहत्य १० लक्ष्याणि प्राप्य मेसेः अष्टलक्ष्योपलब्धिं अतिक्रान्तवान्।

 पादकन्दुकमहामहस्य अद्य रात्रौ परिसमाप्तिः। 

अन्त्यक्रीडायाम् अर्जेंटीना-स्पेयिन् प्रतिद्वन्द्वः। 

न्यू जेर्सी क्रीडाङ्कणम्। 

न्यूयोर्क्> सार्धमासं यावत् अनुवर्तमानस्य पादकन्दुकमहामहस्य अद्य रात्रौ परिसमाप्तिः। आविश्वं आकाङ्कापूर्वं अवलोक्यमानायाम् अन्त्यस्पर्धायां वर्तमानीनः विश्ववीरः अर्जेंटीनादलः स्पेयिन् दलेन सह स्पर्धिष्यते। न्यू जेर्सी क्रीडाङ्कणे रात्रौ १२. ३० वादने [भारतसमयः] अस्ति स्पर्धा। 

  । लयणल् स्कलोनि इत्यनेन परिशीलितः अर्जेंटीना गणः लयणल् मेसीवर्यस्य नायकत्वे एव संग्रमाङ्कणं प्रविशति। रोड्री इत्यस्य नायकत्वे वर्तमानस्य स्पेयिन् गणस्य परिशीलकः  लूयिस् डि ला फ्यूवन्ते भवति।

 सोनं वाङ् चुकः बलेन आतुरालयं प्रवेशितः। 

अनशनं दीक्षन् सोनं वर्यः। 

नवदिल्ली> जन्तर मन्दर विशालाङ्कणे सि जे पी आन्दोलनस्य अंशतया अनशनं क्रियमाणः विख्यातः शैक्षिक-पर्यावरणप्रवर्तकः लडाकदेशीयः सोनं वाङ् चुकवर्यः आरक्षकैः निगृहीतः सन् आतुरालयं प्रवेशितः। अनिश्चितकालानशने २० दिनानि अतीते तस्य प्राणाः संरक्षणीयाः इति दिल्ली उच्चन्यायीलयेन राज्य-केन्द्रप्रशासने निर्दिष्टे आस्ताम्। तदनुसृत्य अस्ति दिल्ली आरक्षकसेनायाः अयं प्रक्रमः। 

 शनिवासरे प्रभाते जन्तर मन्दरः नाटकीयरंगानां साक्षीभूतः अभवत्। सी जे पी प्रवर्तकानां प्रतिषेधस्य मध्ये आरक्षकाः सोनं वर्यं निगृह्य  आतुरालयं नीतवन्तः।

 'भ्रमणपथे प्रथमदिनम्'।

बहिराकाशनिलयात् अनिल मेनोनस्य दृश्यलेखः। 

ISS निलयान्तर्गतः अनिल मेनोनः निलयः च।

> अन्ताराष्ट्रबहिराकाशनिलयं  [ISS] प्राप्तेषु यात्रिकेषु अन्यतमस्य अर्धकेरलीयस्य अनिल मेनोनस्य दृश्यलेखः 'एक्स्' माध्यमेन प्रकाशितः। सुरक्षितः सन् निलयं प्राप्य अनन्तरं तस्य प्रथमः सन्देशो भवत्येषः। 

  "भ्रमणपथे प्रथमदिनमस्ति। भूमिं प्रति कृतज्ञता, प्रेमः, तस्याः रूपम् इत्यादीनि  मां विकारतरलितं कुर्वन्ति। ISS तः सर्वेभ्यः 'हरि ओम्'।

  निमिषैकदैर्घ्यात्मके दृश्यलेखे भूमौ आदरः, मनुष्याणां भाविनि बहिराकाशदौत्यं प्रति प्रतीक्षा च सः प्रकाशयति।

 अमृतभारत रेल् निस्थानाम् उद्घाटनं सम्पन्नम्।

जलन्धर्> राष्ट्रस्य ७५ अमृतभारत रेल् निस्थानाम् उद्घाटनं प्रधानमन्त्री नरेन्द्र मोदी निरवहत्। गुरुवासरे सायं पञ्चाबस्थे 'जलन्धर् कन्टोण्मेन्ट्' इत्यत्र वीडियोमेलनद्वारा आसीत् कार्यक्रमः। 

  तमिलनाटस्य त्रीणि, केरलस्य षट् च रेल् निस्थानानि एतेषु अन्तर्भवन्ति।

 प्रथमं हैड्रजन् रेल् यानं सेवाम् आरभत।

हैड्रजन् रेल् यानं प्रधानमन्त्री नरेन्द्र मोदी प्रारम्भयति। 

 

जिन्द्> राष्ट्रस्य प्रथमं हैड्रजन् रेल् यानं, तथा विश्वस्मिन् दैर्घ्यतमा 'ब्रोड् गेज् हैड्रजन् रेल् यानम्' इति विख्यातिमापद्यमानं 'नमो ग्रीन् ट्रयिन्' इत्यस्य प्रथमा सेवा हरियानस्थे जिन्दे प्रधानमन्त्रिणा नरेन्द्र मोदिना शुक्रवासरे उद्घाटिता। 

  तैलेन्धनसन्दिग्धतायामपि भारतस्य विकासः न स्थगितः इत्यस्य निदर्शनं भवति हैड्रजन् वायुना प्रवर्तमानं रेल् यानमिति प्रधानमन्त्रिणा प्रोक्तम्। 

  उत्तरक्षेत्रीय रेल्विभागस्य दिल्ली प्रान्ते जिन्द- सोनिपत् मार्गे अस्ति "एछ् रेल्यानस्य" सेवा। ८९ कि मी दैर्घ्यमस्ति। यात्राशुल्कं दशतः आरभ्य ३५ रूप्यकाणि पर्यन्तमिति प्रतीक्षते। प्रतिदिनं सेवाचक्रद्वयं व्यवस्थापितम्।

 अमेरिका-देशेन ईराने आक्रमणं तीव्रीकृतम्

 चबहार-नगरे पत्तन-निरीक्षण-स्तम्भः ध्वंसितः, स्थलाक्रमणं करिष्यामीति ट्रम्पस्य पूर्वसूचना ।

          अनुस्यूततया सप्तमदिने अपि ईरान अमेरिका-देशयोर्मध्ये आक्रमणं प्रचलति। चबहार-नगरे पत्तन-निरीक्षण-स्तम्भः विनष्टः इति अमेरिका-देशेन घोषितम्। अनेन होर्मुज़-जलान्तरालसन्धौ महानौकायाः अनुमार्गणं लक्ष्यीकरणं कर्तुं IRGC संस्थायाः सामर्थ्यं बाधितं भविष्यति इति अमेरिका-सेना कथयति। ईराने स्थलाक्रमणं करिष्यामि इति राष्ट्रपतिः डोनाल्ड-ट्रम्पः अपि अवदत्। आकाशे युद्धविमानेषु इन्धनपूरणसमर्थान् अधिकान् जेट्-विमानान् इस्रायेल-देशं प्रति प्रेषितुम् अपि ट्रम्पस्य प्रयासः अस्ति।ईरानस्य सिरिक्, बन्दर् अब्बास्, खषाम् इत्यादिषु स्थानेषु विस्फोटाः अभवन्। नौका-अवरोधस्य आरम्भात् परं होर्मुज़-क्षेत्रे चत्वारः महानौकाः निरुद्धाः इति 'यू.एस्. सेन्ट्रल् कमाण्ड्' दलेन सूचितम्। एका नौका आक्रम्य निष्क्रियीकृता, अन्या एका नौका सैनिकाः आरूढवन्तः इति 'यू.एस्. सेन्ट्रल् कमाण्ड्' वदति। खार्ग्-द्वीपे सुबद्धम् ईरानस्य तैल-वाहनैका अमेरिका-देशेन आक्रमिता इति बुषेहर्-नगरस्य राज्यपालः न्यवेदयत्। होर्मुज़-जलान्तरालसन्धिं पारं गन्तुं प्रयतमाना ताईलान्ट्-ध्वजयुक्ता नौका 'इस्लामिक-रिवोल्यूषणरी-गार्ड' दलेन आक्रमिता इति ईरानः प्रतिवेदयति।

 "तृतीयभाषा नवमकक्ष्यायां नारम्भणीया।"

सर्वोच्चन्यायालयस्य निरीक्षणम्।

नवदिल्ली> सी बी एस् ई संस्थायाः त्रिभाषानये विवादे जाते, तृतीयभाषायाः अध्यापनं नवम्यां कक्ष्यायां समाप्तव्यमिति सर्वोच्चन्यायालयेन निरीक्षितम्। दशमकक्ष्यायां सामान्यपरीक्षा समागच्छति इत्येतत् उद्भाव्य  अष्टमकक्ष्यात एव  छात्रेषु मानसिकसम्मर्दः जायेत।  तदानीं  तृतीया कापि भाषा पठनीया इत्येतत् अधिकसम्मर्दाय भविष्यति। अतः नवमकक्ष्यायां नूतनी भाषा न अध्यापयितव्या इति न्यायाधीशा बी वी नागरत्ना, न्यायाधीशः आर् महादेवः इत्येतयोः नीतिपीठेन निरीक्षितम्। 

  तमिलनाटे नवोदयविद्यालयानां संस्थापनमधिकृत्य प्रकरणस्य व्यवहारे आसीत् नीतिपीठस्य प्रस्तावः। नवोदयविद्यालयाः केन्द्रसर्वकारस्य अधीशत्वे सन्ति इत्यतः तान् प्रति  विरोधस्य अवकाशः नास्तीति तमिलनाटसर्वकारं  न्यायालयः उपदिदेश।

  

 'ओपरेषन् तूफान्' अभियोजनायै तमिलनाट् मुख्यमन्त्रिणः समर्थनम्। 

विजयः कोच्चीनगरे मोहन्लालेन सह उद्बोधनं करिष्यति। 

रमेश् चेन्नित्तलवर्यस्य विजयेन सह मेलनम्। 

चेन्नै> मादकाधोलोकसंघस्य उन्मूलनाशाय केरले आरब्धायै  ओपरेषन् तूफान् अभियोजनायै तमिलनाटस्य मुख्यमन्त्री विजय जोसफः अनुकूलताम् उद्घोषितवान्। अभियोजनायाः अंशतया अचिरेण कोच्चीनगरे आयोज्यमाने प्रबोधनकार्यक्रमे मोहन् लालेन सह उद्बोधनं करिष्यामीति विजयः सम्मतिं ददौ। 

  गतदिने  केरलस्य गृहमन्त्री रमेश् चेन्नित्तलावर्यः चेन्नै नगरं प्राप्य विजयेन सह चर्चां कृतवान् आसीत्।  मादकवस्तुकेन्द्राणि अन्वेष्टुं व्यापननिरोधाय च राज्यद्वयं परस्परं सहयोक्ष्यति।

 पुरी जगन्नाथमन्दिरस्य रथोत्सवे  महान् जनसम्मर्दः

एकः मृतः, शतं क्षताः। 

पुरी रथयात्रायाः दृश्यानि। 

पुरी> ओडीषायां पुरी जगन्नाथमन्दिरे रथोत्सवमध्ये जाते महति जनसम्मर्दे एकः मृतः। शताधिके जनाः क्षताः जाताः। गुरुवासरे आसीदियं दुर्घटना।

  मन्दिरस्य विख्यातं रथावहनं द्रष्टुं लक्षशः भक्ताः गतदिने 'ग्रान्ड् रोड्' वीथीं सम्प्राप्तवन्तः। तत्र जातेन परस्परसंघर्षणेन आसीदयं दुरन्तः। 

  जगन्नाथरथोत्सवे प्रतिवर्षं लक्षशः तीर्थाटकाः राज्यात् अन्तः बहिश्च प्राप्नुवन्ति। गतवर्षे च रथाकर्षणवेलायां दुरापन्ने  अभिसम्पाते त्रयः मृताः, पञ्चाशदधिके जनाः क्षताश्च।

 म्यान्मरतीरसमुद्रे यात्रानौका निमज्य ५०० जनाः मृताः।

जनीवा> रोहिंगीयैः अभयार्थिभिः सह सञ्चरन्त्यौ  द्वे नौके म्यान्मरदेशस्य तीरे वंगसमुद्रान्तराले निमज्य ५०० जनाः मृत्युमुपगताः इत्याशङ्का यू एन् संस्थया निगदिता। जूण् मासस्य अन्त्यदिनेषु म्यान्मरतः प्रस्थितं  बृहन्नौकाद्वयमेव दुर्घटनाधीनं गतमिति संयुक्तराष्ट्रसभायाः देशान्तराधिवासविभागेन [IOM] अभयार्थिनाम् अभिकरणसंस्थया [UNHCR] च संयुक्तप्रस्तावेन निगदितम्।

  इस्लामीयन्यूनपक्षेन राहिंग्यसमूहेन सह म्यान्मरस्य संघर्षबाधितप्रदेशात् राखैनराज्यात् द्वे नौके प्रस्थिते। बंगलादेशस्थे अभयार्थिशिबिरे उषिताः  रोहिंगीयाः च नौकायामासन्। एकस्यां नौकायां २५० जनाः, अन्यस्यां २८० जनाः चासन्। जूलै अष्टमदिनाङ्के एका नौका समुद्रे निमग्ना इति विवरणम्। इतरया नौकया सह बन्धः विनष्टः जातः इति प्रस्तावेSस्मिन् प्रोक्तम्।

  

 ओडीषा। 

अध्ययनपुस्तकेषु स्खालित्यानि।

एस् सि ई आर् टि पूर्वनिदेशकः निगृहीतः।

भुवनेश्वरम्> प्रथमकक्ष्यातः अष्टमकक्ष्यापर्यन्तं पाठपुस्तकेषु अक्षन्तव्यानि स्खालित्यानि विधत्तानि इत्यारोप्य ओडीषायां राज्यशैक्षिकानुसन्धानप्रशिक्षणपरिषदः [SCERT] भूतपूर्वः निदेशकः मनोज् पाटी आरक्षकैः निगृहीतः। 

  पाठ्यपुस्तकरचनायां यथातथपरिशोधनाः न कृताः, विवरणानां शास्त्रीयता वस्तुताद्यः नावलोकिताः, स्खालित्यसहितानि पाठपुस्तकानि मुद्रणं कर्तुम् अनुज्ञा दत्ता इत्यादयः अपराधाः तस्योपरि आरोपिताः। SCERT संस्थायाः वर्तमानीननिदेशिका मधुस्मिता साहु इत्यनया समर्पितायां याचिकायामेव प्रकरणम्। 

  विख्यातः भौतिकगणितशास्त्रज्ञः ऐसक् न्यूटणः 'विमानचालकः' इत्यभिव्याप्य १५०० स्खालित्यानि पाठपुस्तकेषु आसन्। मुख्यमन्त्री मोहन चरण माजेः निर्देशानुसारं अपराधान्वेषणविभागेन [Crime branch] अन्वेषणमारब्धम्। अस्यांशतया मनोज पाडी, इतरे त्रयः सहनिदेशकाश्च सेवायाः निष्कासिताः अभवन्।

 केरलम्। 

राज्ये विद्युत्सन्दिग्धता तीव्रायते। 

जलबन्धेषु जलव्याप्तिः केवलं २९%।  

विद्युदुपभोगः न्यूनीकर्तव्यः इति वैद्युतमन्त्री।

विद्युत् मन्त्री सण्णी जोसफः। 

पत्तनंतिट्टा> वर्षाकालवृष्टेः न्यूनत्वेन केरले विद्युदुत्पादन संस्थायाः जलसम्भरणीषु जलवितानम् असाधारणतया आकुञ्चितम्। आहत्य जलबन्धेषु २९ प्रतिशतं जलमेवावशिष्यते इति विद्युदुत्पादनसंस्थया [Electricity board] निगदितम्। गतवर्षे अस्मिन् समये एतत् ६०% आसीत्। 

  द्वित्राणि दिनानि यावत् विद्युद्वितरणे संस्थया नियन्त्रणं विधत्तमस्ति। आभ्यन्तरोत्पादनस्य न्यूनतामतिरिच्य केन्द्रविहितात् लभ्यमानविद्युतः न्यूनता, आभ्यन्तरोपभोगस्य वर्धनमित्यादीनि नियन्त्रणस्य कारणमस्तीति विद्युच्छक्तिमन्त्रिणा सण्णि जोसफेन उक्तम्। अतः जनैः यावच्छक्यं विद्युदुपभोगे न्यूनीकरणं विधातव्यमिति तेन अभ्यर्थितम्।

 केरले १९तमपर्यन्तं वृष्टिसाध्यता। 

अनन्तपुरी> उत्तर-पश्चिमवंगसमुद्रान्तराले उत्तर ओडीषा-पश्चिमवंगतटयोः उपरि न्यूनमर्दः रूुपीकृतः इत्यनेन जूलाय् १९ तमदिनाङ्कपर्यन्तं केरलमशेषं लघुरूपेण वा मितं च वृष्टिः भविष्यतीति ऋतुविज्ञानीयकेन्द्रेण निगदितम्। वंगसमुद्रे बङ्गलादेशस्य उपरि च जातः चक्रवातावर्त एव न्यूनमर्दरूपेण परिवर्तितः।

 फिफा विश्वचषकः।

अर्जेन्टीना अन्त्यस्पर्धां  प्रविवेश।

अट्लान्टा> पूर्वान्त्यचक्रस्य द्वितीये प्रतिद्वन्द्वे इङ्गलण्टदलम् एकं विरुध्य लक्ष्यद्वयेन   विजित्य मेसीसंघः अन्त्यस्पर्धां प्राविशत्।

 कुचेष्टितैः सम्पन्नः आसीत् प्रथमार्धः। बहुवारं पीतदण्डपत्रं प्रदर्शितं क्रीडानियन्त्रकेण, उभाभ्यामपि दलाभ्याम्। लक्ष्यरहितेन प्रथमार्धः समाप्तः। 

 ५५ तमे निमिषे गोर्डण् इत्यनेन अर्जेंटीनायाः जालं प्रकम्पितम्। ततः  नैकवारम् अर्जेंटीनायाः लक्ष्यप्रहाराः इङ्गलण्टस्य लक्ष्यरक्षकेण प्रतिरुद्धाः।लक्ष्यं प्रत्यर्पयितुं कृतः प्रयत्नः अचिरेण सफलः जातः। ८६ तमे निमिषे अन्सो फेर्णाण्टसेन अर्जेंटीना समस्थितिं प्राप - १-१। अनन्तरं ९०+२ तमे निमिषे ले मार्टिनस् नामकः अर्जेंटीना क्रीडकः तेषां विजयक्ष्यं सम्पाद्य अजय्याम् अर्जेंटीनां अन्त्यस्पर्धां प्रावेशयत्।

 भारत-इङ्गलण्टयोः एकदिनस्पर्धा - भारतस्य विजयः।

अक्सर पटेलः रोहित शर्मा च कन्दुकताडने 

 

बर्मिङामः>  टि-२० क्रिकट्परम्परायाम् अभिमुखीकृतस्य बृहत्पराजयस्यानन्तरम् आश्वासरूपेण एकदिनपरम्परायाः प्रथमस्पर्धायाम् इङ्गलण्टं विरुध्य भारतस्य षट् द्वारकाणां गम्भीरविजयः। प्राप्ताङ्कसूचिका - इङ्गलण्टः ४७. ५ क्षेपणचक्रेषु २५८/ सर्वे बहिर्नीताः। भारतं ४५. २ क्षेपणचक्रेषु २६२/४। 

  चत्वारि द्वारकाणि, ५७ धावनाङ्कान् च सम्पादितवान् अक्सर पटेलः श्रेष्ठक्रीडकः अभवत्। भारतनायकः शुभमान गिलः ८० धावनाङ्कान् सम्पाद्य व्रणितः सन् निवृत्तः। वाषिङ्टण् सुन्दरः (५२), श्रेयस् अय्यरः (३५) च कन्दुकताडने प्रभावं प्रकटितवन्तौ। स्पर्धात्रयात्मिकायाः परम्परायाः द्वितीयस्पर्धा गुरुवासरे कार्डिफ् इत्यत्र सम्पत्स्यते।

 अर्जेंटीना - इङ्गलण्टयोः पूर्वान्त्यस्पर्धा अद्य रात्रौ। 

अट्लान्टा> पारम्पर्यवैरिणः इति विख्यातयोः अर्जेंटीना - इङ्गलण्टयोः पूर्वान्त्यसंग्रामः बुधवासरे रात्रौ १२. ३० वादने (भारतसमयः) जोर्जियाराज्ये [यू एस् ए] अट्लान्टा क्रीडाङ्कणे सम्पत्स्यते। 

  नीलवर्णात्मकक्रीडावेषं [Navy blue] धृत्वा भवेत् अर्जेंटीनायाः क्रीडा इति सूच्यते। अमेरिकीयाः सन्ति क्रीडानियन्त्रकाः। इस्मायिल् एल्फात् नामकः मुख्यनियन्त्रकः भविष्यति।

 पश्चिमेष्या रक्तरूषिता। 

द्वे यू ए ई पण्यनौके इरानेन आक्रान्ते।  

भारतीयनाविकः मृतः। 

दुबाय्> होर्मुस् समुद्रसङ्कोचस्य नियन्त्रणमधिकृत्य विवादेन पश्चिमेष्या पुनरपि रक्तरूषिता अभवत्। मङ्गलवासरे ओमानस्य समुद्रसीमायां यू ए ई राष्ट्रस्य ध्वजं वहन्त्यौ द्वे पण्यमहानौके इरानेन आक्रान्ते। एकः भारतीयनाविकः  हतः। १० नाविकाः आहताः। 

  महानौकाद्वये अपि ३० भारतीयनाविकान् अभिव्याप्य ४३ नाविकाः  आसन्। पश्चिमेष्यायुद्धे अद्यावधि आहत्य १४ भारतीयानां जीवहानिरभवत्।

 नासा बहिराकाशदौत्यं सम्पूर्णविजयः। 

यात्रिकसंघः बहिराकाशनिलयं प्राप्तः। 

त्रयः यात्रिकाः पेटकप्रवेशात् पूर्वम्।

वाषिङ्टणः> केरलदेशीयः नासाशास्त्रज्ञः डो अनिल मेनोनः द्वौ रष्यीयशास्त्रज्ञौ च अद्य प्रत्युषसि सार्धैकवादने [भारतसमयः] अन्ताराष्ट्र बहिराकाशनिलयं [ISS] प्रविष्टवन्तः। मङ्गलवासरे रात्रौ ८. १७ वादने एते त्रयः  रष्यायाः बहिराकाशाभिकर्ता 'रोस् कोस्मोस्' इत्यस्य सोयूस् एम् एस् - २९ नामके पेटके ऐ एस् एस् प्रति यात्राम् आरभन्त। होरात्रयस्य सञ्चारानन्तरं  रात्रौ ११. २५ वादने पेटकं ऐ एस् एस् निलयेन सह सम्बद्धम्। सार्धैकवादने द्वारमुद्घाट्य ऐ एस् एस्  प्रति प्रविष्टवन्तः। 

  परं ८ मासान् यावत् निलये गवेषणे व्यापरिष्यन्ति। २०२७ एप्रिल् मासे संघस्य भूमिं प्रति निवर्तनं भविष्यति।

 फिफा विश्वचषकः।

स्पेयिनः अन्त्यस्पर्धायाम्।

डालस्> अत्यन्तम् उत्साहोज्वले प्रथमे पूर्वान्त्यप्रतिद्वन्द्वे प्रबलं फ्रान्सं २ - ० इति लक्ष्यक्रमेण पराजित्य स्पेयिनः अन्त्यस्पर्धां प्रविवेश। 

  चटुलैः सुन्दरैश्च कन्दुकचालनैः सम्पन्ने प्रथमार्धे फ्रान्सं विरुध्य विहितं दण्डप्रहारं स्पेयिनस्य ओयार् सबालः लक्ष्यं चकार। एवं २२ तमे निमिषे स्पेयिनः आधिपत्यं जग्राह, १-०। 

 द्वितीयार्धे स्पेयिनः स्वीयां लक्ष्यसम्पदं २ - ० इति संवर्धापयामास। ५८ तमे निमिषे पेड्रो पोरो इत्यनेन आसीत् द्वितीयं लक्ष्यकन्दुकम्। ततः फ्रान्सेन कृताः द्वित्राः लक्ष्यप्रयत्नाः निष्फलत्वं प्रापुः।एकस्मै अपि लक्ष्याय जीवन्मरणसंग्रामं कृतवान् किलियन् एं बापे ८६ तमे निमिषे पीतदण्डपत्रं सम्पादयामास च।

 स्फोटनं - नागालान्टे सैनिकः वीरमृत्युं प्राप।

चत्वारः आहताः।

कोहीमा> नागालान्टे चमुकेडिमा जनपदे दुरापन्ने ऐ ई डि स्फोटने 'असं रैफिल्स्' सेनायाः कश्चन भटः वीरमृत्युं प्राप। चत्वारः व्रणिताः जाताः। कस्यचनापि नामादिकं न प्रकाशितम्।  

  सुरक्षासेनायाः वाहनव्यूहस्य समीपे आसीत्  स्फोटनम्। व्रणिताः समीपस्थम् आतुरालयं प्रवेशिताः। घटनामधिकृत्य अन्वेषणमारब्धम्।

 त्रयः सञ्चारिणः अद्य बहिराकाशं प्रति।

यात्रिकेषु अनिल मेनोनः प्रथमः केरलीयः।

अनिल मेनोनः 

बैकनूर् [कसाकिस्थानं]> मङ्गलवासरस्य रात्रौ ८:१७ वादने (भारतसमयः) त्रयः बहिराकाशशास्त्रज्ञाः अन्ताराष्ट्र बहिराकाशनिलयं प्रति प्रस्थास्यन्ति।  अष्टमासान् यावत् विविधोद्देशगवेषणाभ्यां ते कालं यापयिष्यन्ति।

  नासा शास्त्रज्ञाः अनिल मेनोनः, प्रोतृ दुब्रो, अन्ना किकिना इत्येते यात्रां कुर्वन्ति। तेषु अनिल मेनोनः बहिराकाशयात्रां कुर्वतां मध्ये  प्रथम केरलदेशीयः इति प्रथाम् आवहति।  

  रष्यायाः बहिराकाशाभिकर्ता रोस् कोस्मोस् इत्यस्य सोयूस् एम् एस् -२९ इति पेटके अस्ति यात्रा। कसाखिस्खानस्थे बैकनूरे वर्तमानात् बहिराकाशनिलयादेव विक्षेपः।

 लोर्ड्स् क्रीडाङ्कणे भारतीयमहिलानां चरित्ररचना।

इङ्लाण्टं विरुध्य निकषस्पर्धायां भारतस्य प्रोज्वलविजयः।

लोर्ड्स् क्रीडाङ्कणे विजयश्रीलालिताः भारतीयमहिलाः।
 

लण्टनं> लोर्ड्स् क्रीडाङ्कणे क्रिकट् निकषस्पर्धां विजयमानः प्रथमः महिलागणः इति ख्यातिः भारतस्य। इङ्लाण्टं विरुध्य एकैकस्यां निकषस्पर्धायां भारतस्य २७० धावनाङ्कानां अत्युज्वलविजयः। यास्तिका भाटियायाः शतकं, क्रान्ति गौडायाः पञ्च द्वारकोपलब्धिश्च भारतविजयस्य आधारः। 

  हर्मन् प्रीत कौर् वर्यायाः नेतृत्वे क्रीडितवत्यः भारतीयवनिताः प्रथमचरणे स्मृति मन्थाना (८३), हर्मन् प्रीत कौर् (५८), दीप्ती शर्मा (५७) इत्येतासां अनुपमप्रकटने भारतं २८५ धावनाङ्कान् सम्पादयामास।  इङ्गलाण्टस्य  प्रत्युत्तरताडनं १७०  धावनाङ्केषु समापितम्।  क्रान्ति गौड् वर्या पञ्च द्वारकाणि सम्पादितवती। भारताय ११५ धावनाङ्कानां पुरतःस्थितिः। 

  द्वितीयचरणे यास्तिका भाटिया ११३ धावनाङ्कान् सम्पाद्य भारतविजयस्य आधारशिलां स्थापितवती। ३४१ / ७ इत्यस्मिन् प्राप्ताङ्के भारतस्य निवृत्तिः। ४५७ धावनाङ्कानां विजयलक्ष्येण क्रीडितः इङ्गलाण्टदलः १८६ धावनाङ्कान् सम्पाद्य सर्वाः बहिर्गताः। भारतस्य २७० धावनाङ्कानां प्रोज्वलविजयः।

 फिफा विश्वचषकः।

पूर्वान्त्यचक्रं श्वः आरभ्यते। 

श्रेण्यां प्रथमचत्वारः स्पर्धन्ते। 

न्यूयोर्क्> २३तमविश्वचषकपादकन्दुकस्य पूर्वान्त्यचक्रस्पर्धा मङ्गलवासरस्य रात्रौ (भारतीयसमयः) आरभ्यते। फिफा संस्थायाः सजीवश्रेण्यां [live ranking] अग्रे  वर्तमानाः चत्वारः गणाः पूर्वान्त्यचक्रे प्रतिस्पर्धन्ते इति विशेषता अस्ति। फ्रान्स् (प्रथमश्रेणी), अर्जेंटीना (श्रे २), स्पेयिनः (३), इङ्गलण्टः (४) इत्येते प्रथमस्थानीयाः एव पूर्वान्त्यचक्रं प्रविष्टवन्तः।  गणवीरतां प्राप्य एव एते निर्णायकचक्रं [knockout] प्रविष्टाः। 

  मङ्गलवासरे अर्धरात्रे - १२. ३० - फ्रान्सः स्पेयिनेन सह स्पर्धिष्यते।  अपरेद्युः अर्धरात्रे इङ्गलण्ट-अर्जेंटीना स्पर्धा सम्पत्स्यते। जूलै १९ प्रत्युषसि २. ३० वादने विनष्टान्त्यानां [Loser's final] स्पर्धा भविष्यति।  अन्त्यस्पर्धा जूलै १९ अर्धरात्रे १२. ३० वादने च सम्पत्स्यते।

 केरलम्। 

ओपरेषन् तूफान् - ११६ किलो गञ्जाभाण्डैः ४ ओडीषायुवकाः निगृहीताः। 

करुकुट्टीमध्ये निगृहीतैः गञ्जाभाण्डैः अपराधिभिः च सह एक्लैस् अधिकारिणः। 

कोच्ची> केरलराज्यं उन्मादकवस्तुनिर्मुक्तं कर्तुं राज्यप्रशासनेन समारब्धम् 'ओपरेषन् तूफान्' नामकं दौत्यम् आराज्यम् अभङ्गुरमनुवर्तते। एरणाकुलं जनपदस्थे करुकुट्टी इत्यत्र रेल्निस्थानसमीपात् ११६. ३७ किलोमितैः गञ्जाभाण्डैः चत्वारः युवकाः उत्पादनकरविभागेन [Excise department] निगृहीताः। लहरिवस्तुविपणने मध्यस्थाः एते ओडीषाराज्यीयाः इति अधिकारिभिः उक्तम्। 

  किलोद्वयमितगञ्जायाः  ५८ भाण्डाः ११ स्यूत्येषु संस्थाप्य रेल् मार्गं प्राप्ताः आसन्। अङ्कमाली मद्यनिर्मार्जनसंघाय लब्धायाः गुप्तसूचनायाः आधारे कृते अन्वेषणे अस्ति एतेषां निग्रहणम्।

 तमिलनाट्।

करूर् दुरन्तः - मृतानां परिवारेभ्यः ३१ जनेभ्यः सर्वकारवृत्तिः। 

उद्योगनियुक्तिपत्रं विजयः समर्पितवान्।

चेन्नै> २०२५ सेप्टम्बरमासे तमिलनाटे करूर् प्रदेशे जोसफ विजयः अध्यक्षपदम् अलङ्कुर्वाणस्य टि वी के दलस्य सार्वजनिक मेलने  जातजनसम्मर्देन मृतानां  परिवारेभ्यः एकैकस्मै सर्वकारीयवृत्तिः दीयते। वृत्तिं नियुज्यमानाः आदेशाः गतदिने करूरे सम्पन्ने जनसम्मेलने मुख्यमन्त्री जोसफ् विजयः वृत्त्यर्थिभ्यः हस्तान्तरीकृतवान्। ३१ जनाः नियुक्तिपत्रं स्वीकृतवन्तः।